«У қиз боламас дейишган». Илмира Раҳимжонова туҳмат сабаб бир йил тилдан қолгани ва ўзини ўлдирмоқчи бўлгани ҳақида гапирди (видео)  

Актриса Илмира Раҳимжонова «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Илмира Раҳимжонова суҳбат давомида уни «номуссиз» дея туҳмат қилишгани, бунинг натижасида қаттиқ депрессияга тушиб, бир йил гапира олмай қолгани, ҳаттоки ўзини ўлдириш даражасига боргани ҳақида гапириб берди.

«Балли қизлар» танлови бўлди, мен иккинчи ўринни олганман. Биз у ерда овқатланганмиз, мен помидорни пўстини арчмасдан еганман ва мазам қочиб қолган. Икки-уч кун «ўтиб кетади, ўтиб кетади» деб, юрганман, бир кун кундузи ҳушимдан кетиб, Бўстонлиқда касалхонага тушиб қолганман.

Кейин қишлоқда дув-дув гап бўлган, фалончини қизи фалон жойга борган экан… Энди у гапни ҳам ўзимнинг яқинларим тарқатган, «энди у қиз боламас, шу икки-уч кунда ким билади қаерларда, ким билан юрган деб туҳмат гапларни тарқатишган. Ўшанда мен қаттиқ психологик зарба олганман.

Касалхонага бориб ҳушимдан кетганимдан кейин поликлиникадан шаҳар шифохонасига олиб кетишган. Бир кун вақт ўтган, ота-онам қидирган. Поликлиникада бир қишлоқдош ҳамшира бор эди, унга «ота-онамга айтиб қўйинг», деб илтимос қилгандим. Кўп болали аёл эди, ота-онамга касалхонага тушганимни айтиб қўйишга имкон тополмаган.

Мен шу даражада сиқилганман, ўзимни ўлдириш даражасигача бориб, гапиролмай қолганман. Бир йилгача гапирмаганман. Кун бўйи бир нуқтага тикилиб ўтираверардим. Билмадим нималарни ўйлардим, билмайман. Баъзида ҳаётингиздаги кўп воқеаларга бирваракайига жавоб излашга тўғри келаркан.

Бу туҳматдан қутулиш қийин. Буни ўша вақтда исбот қила олмагансиз. Лекин йиллар давомида инсонлар сизни кузатиб, ўзлари хато гумонда, фикрда эканлигини тушуниб етишган. Бу туҳматда бир йиллар ичида қутулганман. Балки, бунинг асорати ҳали ҳам бордир, балки ўйнаган персонажларимда яшаганим учун бу нарсалар чиқиб кетгани билмай ҳам қоласиз.

Жонимга ҳақиқатан ҳам қасд қилмоқчи бўлганман. Ўзимни поезд тагига ташламоқчи бўлганман. Орқамизда «электричка» ўтарди, икки-уч маротаба ўшани йўлида юриб кўрганман. Ўшанда ўзим билан ўзим гаплашганман. «Синглинг, укаларинг нима бўлади? Онам ўлди, бобом ўлди — ҳамма унутиб юборди. Ҳаёт эса давом этмоқда, яшаш учун курашаман, деб, бу фикримдан қайтганман.

Илмира Раҳимжонова, актриса

«Чархпалак» сериали, «Забаржад», «Иблис девори», «Чаёнгул», «Соғинч соҳили», «Муҳаббат синовлари», «Ойдиной», «Фаришта», «Фариданинг икки минг қўшиғи» каби фильмларда рол ижро этган.