Италиянинг дунёга машҳур актрисаларидан бири Моника Белуччининг мухлислари унинг гўзаллиги ҳақида кўп гапиришади. Ҳозирда 58 ёшда бўлган актриса гўзал бўлиши ва уни сақлаб қолиши учун бир нечта кўрсатмаларга амал қилади. «Lisa.ru» нашри Моника Белуччининг гўзаллик сирлари ҳақида маълумот берди.
Бассейн туфайли чиройли қоматга эга бўлиш
Моника қийин ва машаққатли машғулотларни ёқтирмайди. У табиатан дангаса эканлигини тан олган, бундан ташқари, актриса танасини робот каби ҳис қилишни истамайди. Беллуччи бу ҳақда: «Мен ҳеч қачон ориқ бўлолмайман. Овқатланишни яхши кўраман. Мен ҳақиқатан ҳам инсонман. Сохта бўлишни ният қилмайман», — дейди актриса.
Италиялик юлдуз йиллар давомида қандай қилиб чиройли қоматини сақлаб қола олди? У фақат ўзига ёққан нарсани қилади. Актриса бассейнда сузишни яхши кўради ва ҳафтасига тўрт марта у ерда тахминан 45 дақиқа вақт ўтказади. Моника ёгани ҳам яхши кўради.
«Мен ёга билан шуғулланишни яхши кўраман, бироқ кўп саёҳат қиламан, шунинг учун мунтазам машқ қилиш қийин. Илгари умуман ёга билан шуғулланмасдим, ҳозир ҳам у билан ҳар куни шуғулланаётганим йўқ. Менинг турмуш тарзим туфайли бу шунчаки имконсиз, — дейди актриса.
Парҳезларни ёқтирмайдиган актриса
Моника Белуччи умуман парҳез қилмайди. Актриса мазали таомларни истеъмол қилишни яхши кўради. Бироқ асосий нюанс бор — у ҳеч қачон ортиқча овқатланмайди, қисмларга бўлиб овқатланади.
Беллуччи макарон ва пицца, шунингдек, шоколадни жуда яхши кўради. У ўзини севимли овқатидан чекламайди ва агар вазн йўқотиши керак бўлса, ўз парҳезига кўпроқ сабзавот ва меваларни киритади. Ёки қора либосларни кияди.
«Эрталаб соат бешда туриб, олтида машғулотда бўлиш? Йўқ. Спорт залига боришнинг ўрнига, мен шунчаки қора кийимларни кияман: бу осон ва қизиқарлироқ, — дейди Моника. У, шунингдек, аёлларга ўзларини севимли таомлари билан хурсанд қилиш ва истеъмол қилинган овқат учун ўзларини койимасликни маслаҳат беради.
Юз териси парвариши
Актриса юз терисига алоҳида эътибор беради. Ҳар куни эрталаб душ қабул қилади, сўнгра юзини тоник, сиворотка (зардоб) ва намлантирувчи крем билан уқалайди. Ҳафтада бир неча марта терини скраб ва ўзи тайёрлаган бодом ёғли ниқоб билан тозалайди.
«Мен юз теримга ғамхўрлик қиламан, унинг ялтираб туриши макияжнинг чиройли чиқишини таъминлайди. Тозалаш ва намлантиришга масъулият билан ёндашаман. Лабларим катта бўлганлиги сабабли улар қуришга мойил, шунинг учун уларни намлантиришим керак», — дейди Беллуччи.
Сочни парвариш қилиш
Италиялик актрисанинг нафақат юзи ва танаси, балки сочлари ҳам ажойиб кўринишга эга. У сочларини ҳафтасига икки мартадан кўп ювмаслигини айтган. Актриса шампунни минерал сув билан суюлтиради, чунки у косметик маҳсулотда жуда кўп концентратлар бор деб ҳисоблайди.
Беллуччи сочига зарар етказишдан қўрқиб, деярли сочларини фен билан қуритмайди. Актрисанинг жингалак сочларининг чиройли кўриниши ва майинлигининг сири — бу уларни озиқлантирадиган зайтун ёғининг таъсиридир.
Макияж
Моника кундалик ҳаётида юзига кўп косметика воситаларини ишлатишни ёқтирмайди. Одатда актриса, кўзларини бўяши, киприкларига туш суриб лабларини бўяши мумкин.
«Мен табиий кўринишни афзал деб биламан. Менга терим нафас оладиган маҳсулотлар ёқади. Кундалик макияж учун оч кул ранг ёки жигарранг, бир сўз билан айтганда, кўзимнинг рангига мос тушадиган жуда енгил тенларни танлайман. Мен одатда қора тушдан фойдаланаман. Бу образнинг янада тугалроқ қилишга ёрдам беради», — дейди Моника.
Актриса одатда ёрқин қизил лаб бўёғидан фойдаланишни яхши кўради, бу ранг унинг образига янада кўрк бағишлайди.
Пластик операцияларга қарши
Моника Белуччи пластик операцияларга қарши актрисалардан бири. У тўғри парвариш ёш кўринишни сақлаб қолишга ёрдам беришига ишонади ва пластик операция индивидуалликдан маҳрум қилади.
«Мен ҳаётимда ҳеч қачон пластик жарроҳликдан фойдаланмайман, ҳамма нарса ўз йўлида кетиши керак. Қирқ ёшли аёлнинг йигирма ёшдек кўринишга ҳаракат қилиши бемаъни ва кулгили», — дейди Беллуччи.
Дам олиш
Моника ўз оиласи билан вақт ўтказишни, катта дастурхон атрофида йиғилишни, севимли таомларини ейишни яхши кўради. Шунингдек у инсон ўзи билан ёлғиз қолиши керак деб ҳисоблайди.
«Бўш вақтимда чўмилишни яхши кўраман. Ушбу 45 дақиқа ёки бир соат ичида фақат ўзингизга меҳр бериш жуда муҳим», — дейди Голливуд юлдузи.
Ёшни қабул қилиш
Мониканинг 58 ёшда эканлигига ишониш қийин, аммо бу факт. Актрисанинг ўзи бу рақамлар ҳақида қайғурмайди — аксинча, у ўз ёшини қабул қилади ва ҳозир 20 ёшдан кўра бахтлироқ эканлигига ишонтиради.
«Кўплаб инсонлар ёши ўтиши билан гўзаллигини йўқотишдан қўрқади, бироқ мен бу нарсалар ҳақида қайғурмасликка ҳаракат қиламан. Мен ўлимдан кўпроқ қўрқаман, чунки икки нафар фарзандим бор ва уларнинг улғайишини кўрмоқчиман. Бари бир қариганда ҳеч нарса қила олмайсиз, шунинг учун уни қабул қилган маъқул. Фарзандли бўлмаганимда ўлим ҳақида ўйламасдим, қариётганимни ҳам сезмасдим. 45 ёшимда эса иккинчи фарзандимни дунёга келтирдим ва ёшлигимда жисмонан анча кучли эканлигимни англадим. Бироқ, ҳозир ўзимни 20 ёшимдагидан анча яхши ҳис қиляпман. Мен ўзимга ишонаман ва муаммоларни осон ҳал қиламан. Ўзимни боримча қабул қиламан», — дейди Беллуччи.
Барча аёлларга маслаҳат
Моника аёл киши ўзига ишонган ҳамда ҳеч кимга ўхшашга ҳаракат қилмаган тақдирда гўзал бўлишини айтади. Актрисанинг сўзларига кўра, гўзаллик ташқи кўриниш билан боғлиқ эмас, у аёлнинг ҳаётий тажрибаларини акс эттирувчи нафисликдир.
«Мен ҳар доим ёш қизларга ўзини яхши кўриши ҳақида айтаман. Ахир, гўзаллик идеали мавжуд эмас, тўладан келган аёллар гўзалликда озғин қизлардан қолишмайди. Сиз ўзингизнинг кимлигингизни қабул қилишни ўрганишингиз керак. Мен ўзимни боримча қабул қиламан, шунингдек, идеаллик мавжуд эмас ва шунинг учун мен бунга интилмайман», — дейди актриса.
Асосий гўзаллик сири
«Инсонлар мени гўзал деганлари учун эмас, балки ўзим танлаган ҳаётда яшаётганим учун ўзимни жуда қулайликни ҳис этаман. Мен ҳаётни севаман. Бу менинг гўзаллигимнинг энг асосий сири», — дея хулоса қилади Моника Беллуччи.
Мавзуга доир:
- Моника Беллуччи, Салма Хаек ва ҳеч қачон пластик операцияга мурожаат қилмаган машҳурлар (фото).
- «Бировга буюм сингари эгалик қилишни исташ — бемаънилик». 57 ёшни қаршилаган Моника Белуччи ҳақиқатлари.
- Стив Жобс, Моника Беллуччи ва бошқа машҳурларнинг модель сифатида карьера бошлаган фарзандлари (фото).
- Гўзаллик маъбудаси: Моника Беллуччининг тарихга кирган 15 та энг ёрқин образи (фото).
Изоҳ (0)