Йўталганда ўпкада оғриқ пайдо бўлишининг сабаблари ва даволаш чоралари

Йўталганда ўпкада оғриқ пайдо бўлиши кўкрак қафасидаги ноқулайликнинг айнан ўзи эмас. Аслида оғриқ ўпкада кузатилмайди. Аммо шамоллаш ва ЎРВИдан кейин кузатиладиган кучли йўталда нега оғриқ пайдо бўлади? Wday нашри қуйида ушбу саволларга жавоб берди.

Нима учун йўталаётганда ўпка оғрийди?

Кўкрак қафасидаги оғриқ ёки тортишиш ҳисси узоқ муддатли шамоллаш ёки бронхит билан оғриган беморларга таниш ҳолат. Айнан йўтал бошланганда ўпка оғриётгандек туйилади. Лекин бу вақтда ўпка оғримайди. Унда бу нима бўлиши мумкин?

Бронхлар. Уларнинг нерв толалари бор. Кучли йўтал билан деворлар зарар кўрганда, оғриқ кузатилади, баъзан эса чиқадиган балғамда қон ҳам пайдо бўлади. Ушбу ҳодисадан қўрқмаслик ва бронхитнинг бошланишини ўтказиб юбормаслик учун шифокор билан маслаҳатлашиш керак.

Ҳалқум. Кўкрак қафасида тарқаладиган ноқулайлик ва оғриқнинг сабаблари жуда фарқ қилади — вирусли, замбуруғ ёки бактериал яллиғланишдан шишга қадар. Бундай вақтда ЛОР шифокорининг текшируви мажбурийдир.

Юрак. Шамоллаш ва томоқ оғриғи даволанмаса, ревматизмни қўзғатиш учун барча имкониятлар мавжуд. Бу касаллик эса юракка таъсир қилади, бу ЎРВИ ёки тонзиллитдан кейин билинади.

Плевра. Инсон ўпкаси плевра деб аталадиган махсус мембрана билан қопланган. Жиддий жароҳатлардан сўнг заифлашган иммунитет ёки механик шикастланиш билан у яллиғланиш жараёни ёки бактериал инфекцияга дуч келиши мумкин. Бундай ҳолда бемор йўталиш, нафас қисилиши, чуқур нафас олишда оғриқлардан шикоят қилади. Плеврани дарҳол даволаш керак, баъзида антибиотик терапияси курси талаб қилинади.

Умуртқа ораси невралгияси. У ўзини кучли оғриқ билан намоён қилади, баъзида оғриқ кўкрак қафасига тарқалади. Невралгия намоён бўлишининг дастлабки босқичларида ундан халос бўлиш осонроқ.

Шундан сўнг хулоса қилиш мумкинки, кўкрак қафасидаги оғриқлар ўпкага тарқалади ва бу жиддий касалликнинг аломати бўлиши мумкин. Бундай вақтда шифокорга ташрифни кечиктирмаслик керак.

Йўтал, ўпка оғрияпти: пневмонияни қандай ўтказиб юбормаслик керак?

Ўпка ўз-ўзидан зарар кўрмаса ҳам, нафас олиш тизимидаги бузилишлар ҳақида огоҳлантириши мумкин. Шунинг учун организмда кечаётган ўзгариш ва сигналларни эътиборсиз қолдирмаслик керак.

Пневмониянинг умумий белгилари кўкрак қафасдаги оғриқ, оғир нафас олиш, умумий заифлик, титроқ ва иситмадир. Агар бу аломатлар йўталаётганда кўкрак қафасидаги оғриқлар билан бирга пайдо бўлса, дарҳол шифокорга — терапевт ёки пулмонологга мурожаат қилиш керак. Шошилинч касалхонага ётиш ва комплекс терапия касалликни ўз вақтида тўхтатишга ёрдам беради.

Юқори нафас йўлларининг кўплаб касалликлари мавжуд бўлиб, улар орасида инсон ва унинг атрофидагилар учун хавфли бўлган сил касаллиги мавжуд. Агар кўкрак қафасида оғриқ пайдо бўлса, мутахассис билан дарҳол боғланиш керак, ўз вақтида кўрсатилган малакали ёрдам беморнинг тезроқ тузалишига сабаб бўлади.