Таиланднинг туризм мутасаддилари кўпроқ сайёҳлар келишига умид қилиб, Марказий Осиёнинг икки давлати — Ўзбекистон ва Қозоғистонни кузатмоқда. Бу ҳақда Тҳаигер нашри хабар бермоқда.
Икки мамлакат саёҳатчилари Таиландга ташриф буюришдан манфаатдор, деди душанба куни Туризм вазири Фифат Ратчакитпракарн.
Фифат Таиланд 1 октябрдан бошлаб визани 15 кундан 30 кунга узайтирганидан сўнг қозоқ ва ўзбекистонлик сайёҳлар қизиқиш кўрсата бошлаганини таъкидлади.
Жорий йилнинг 8 ойида Таиландга Ўзбекистондан 2,5 мингга яқин одам ташриф буюрган.
Туризм вазирлиги йил охирида бу кўрсаткич 8,5 мингтага етишини кутмоқда. 2019 йилда Таиландга келган ўзбекистонлик сайёҳлар сони 19 минг нафарни ташкил этган эди.
Фифет ўзбекистонлик сайёҳлар юқори харажат қобилиятига ва етиб келганда виза олиш ҳуқуқига эга эканлигини, бироқ мамлакатда ҳозирда Таиландга тўғридан-тўғри рейслар йўқлигини таъкидлади.
Air Astana эса 30 октябрдан Қозоғистоннинг Олмаота шаҳридан Бангкок ва Пхукетга ҳар куни тўғридан-тўғри рейсларни йўлга қўйишни режалаштирмоқда.
Sunday Airlines бу қишда Қозоғистоннинг бир қанча шаҳарларидан Пхукет ва У-Тапаога янги рейсларни қўшишни режа қилган. Бу шаҳарларга Олмаота, Остона, Костаний, Чимкент ва Уралск киради.
Жорий йилнинг дастлабки бир неча ойларида Таиландга 22 мингга яқин қозоғистонлик ташриф буюрди, деб хабар берди Nation Thailand.
Туризм вазирлигининг фикрича, йил охиригача бу рақам 55 мингга етиши мумкин. Бу Ковиддан олдинги кунлардаги қозоқ сайёҳлари сонига тенг бўлади. 2019 йилда Таиландга 56 минг қозоғистонлик сайёҳ келган.
1 январдан 8 сентябргача Таиландга 5 миллиондан ортиқ сайёҳ келган. Сайёҳларнинг энг катта гуруҳи Малайзиядан келган — 751 минг киши.
Изоҳ (0)