Осиё Тараққиёт Банки (ОТБ) Ўзбекистонда озиқ-овқат хавфсизлигини таъминлаш, аҳолининг ижтимоий ҳимояга муҳтож қатламини ҳимоя қилиш ва бандликни қўллаб-қувватлаш учун 500 миллион доллар миқдорида кредит ажратишни маъқуллади. Бу ҳақда банк матбуот хизмати хабар бермоқда.
Ҳукумат дастури озиқ-овқат хавфсизлигини мустаҳкамлаш ва нархлар барқарорлигини таъминлаш, кам таъминланган оилалар, кексалар ва аҳолининг ижтимоий ҳимояга муҳтож бошқа қатламларига тўғридан-тўғри ижтимоий ёрдам кўрсатиш, шунингдек, ишсиз ва қайтиб келган меҳнат мигрантларини қўллаб-қувватлашга қаратилган.
Марказий Осиё пандемиядан халос бўлгач, минтақа урушнинг иқтисодий таъсирига дуч келди, бу эса айниқса камбағал одамларнинг ҳаётини оғирлаштирди, — деди ОТБнинг Марказий ва Ғарбий Осиё бўйича департаменти бош директори Евгений Жуков.
Таъкидланишича, дастур Ўзбекистон ҳукуматининг стратегик устувор йўналишларига мос келади ва ижтимоий ҳимояни рағбатлантириш билан бирга иқтисодий барқарорликни оширишга ёрдам беради.
COVID-19 пандемияси ва Россиянинг Украинага бостириб кириши оқибатида юзага келган иқтисодий зарба Ўзбекистонга жиддий зарар етказди.
Ушбу таъсирлар савдо харажатлари, инфляция, ишсизликнинг ошиши ва пул ўтказмаларининг қисқаришини ўз ичига олади.
Бу эса, ўз навбатида, кам таъминланган уй хўжаликларининг харид қобилиятини пасайтиради, шахсий истеъмолни заифлаштиради, қашшоқликнинг кучайишига олиб келади.
Шунингдек, ОТБ мониторинг ва баҳолашни қўллаб-қувватлаш учун техник ёрдам кўрсатади, бу техник ёрдам учун махсус жамғарманинг 400 минг доллар миқдоридаги гранти ҳисобидан молиялаштирилади.
Аввалроқ Осиё тараққиёт банки ва Ўзбекистон 2,8 миллиард долларлик 27 та лойиҳани биргаликда амалга ошириш тўғрисида келишувга эришгани ҳақида хабар берилган эди.
Изоҳ (0)