Бугун,

  • USD 11095.31
  • RUB 173.84
  • EUR 10772.44

Россиянинг Новосибирск вилоятида қисман сафарбарликдан бош тортганларни қидириш бошланди. Бу ҳақда ҳарбий комиссар Евгений Кудрявцев маълум қилди, деб ёзади «Сибкрай». Чақирув қоғозини топширилиши керак бўлган одам топилмаганида, ҳукумат шундай чораларни қўллайди.

Фото: «ТАСС»

Фото: «ТАСС»

Комиссарнинг сўзларига кўра, ҳудуд аҳолисининг кўпчилиги прописка бўйича яшамайди, шу туфайли уларга чақирув қоғозини бериш имкони бўлмаяпти. «Энди улар қидирувда бўлган фуқаролар рўйхатига тушиши мумкин», — дея огоҳлантирди Кудрявцев.

Унинг айтишича, сафарбар қилинган шахснинг яшаш жойига икки марта борилганида натижа бўлмаса, рўйхат тузилиб, полицияга берилади. «Полиция қидирув тадбирларини ўтказади ва агар қасддан бош тортиш бўйича гумонлар бўлса, унда тергов органларига топширилади», — дея аниқлик киритди ҳарбий комиссар.

Россияда қисман сафарбарлик эълон қилинди

21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.

Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва шошилинч хизмат ҳарбий хизматчилари сафарбар этилмайди, деган эди Шойгу.

Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.

Чақирув ёшидаги фуқаролар мамлакатни тарк этиши тақиқланмоқда

Дастлаб Россия ҳудудларидаги ҳарбий комиссарлар сафарбарлик бўйича армияга чақирилиши керак бўлган одамларга ўз шаҳри ёки туманини тарк этишни тақиқлаганди, бироқ 23 сентябрга келиб, уларнинг буйруқларида Россиядан чиқиш кетишга нисбатан тақиқлар пайдо бўлди.

Meduza манбалари маълум қилишича, ДХР, ЛХР ва Украинанинг Херсон ва Запорожье вилоятларидаги босиб олинган ҳудудларда «референдум» тугаганидан кейин сафарбарлик ёшидаги эркакларга Россиядан чиқиб кетиш тақиқланиши кутилмоқда.

Изоҳ
Асосий янгиликлар
Дунё
«Туркия янги дунё тартибининг марказида бўлиши керак» — Эрдўғон
Маҳаллий
Андижонда 41 киши жароҳатланган автоҳалокат қурбонлари сони 4 нафарга етди
Маҳаллий
Ўзбекистонда помидор нархи барқарорлашди