Франция ташқи ишлар вазири Катрин Колонна 27 сентябрь, сешанба куни амалий ташриф билан Киевга келди. Бу ҳақда дипломат Twitter’да маълум қилди.
«Хайрли тонг, Украина! Франция сиз томонда. Киевга яна келганимдан хурсандман», — деб ёзган ТИВ раҳбари. Сиёсатчи, шунингдек, Франциянинг Украинадаги элчиси билан Украина пойтахти бўйлаб сайр қилгани акс этган суратни жойлаштирган.
Франция ТИВ маълумотларига кўра, Колонна Киевда Украина президенти Владимир Зеленский ва Украина ташқи ишлар вазири Дмитрий Кулеба билан учрашади.
«У Франция томонидан мудофаа жиҳозларининг етказиб берилиши, жиноятларнинг жазосиз қолишига қарши курашиш, шунингдек, молиявий ва гуманитар жиҳатдан янада кўпроқ ёрдам кўрсатилишини қайд этади», — дейилган вазирлик хабарида.
Франция Мудофаа вазирлиги раҳбари Себастьян Лекорну Россия президенти Владимир Путиннинг қисман сафарбарлик ҳақидаги баёнотларидан сўнг Франция Украинани қўллаб-қувватлашда давом этишини айтган эди. Унинг қўшимча қилишича, Париж Киевга қурол етказиб бериш ва Украина қуролли кучлари аскарларини тайёрлашда давом этади.
Изоҳ (0)