Жанубий Кореяда ўз жонига қасд қилиш даражаси ўтган бир йил ичида кескин ўсиб, ривожланган мамлакатлар орасида энг юқори бўлиб қолмоқда ва пандемия оқибатлари давом этаётганидан дарак бермоқда. Бу ҳақда Bloomberg хабар берди.
Миллий статистика бошқармаси 27 сентябрь куни тақдим этган маълумотларга кўра, бир йил ичида қарийб 13 300 нафар кореялик ўз жонига қасд қилган — бу ҳар 100 минг кишидан 26 нафари демакдир. Таъкидлаш жоиз, 2020 йилда ушбу кўрсаткич 25,7 га тенг эди.
Яқинда эса Жанубий Корея энг паст туғилиш даражаси бўйича ўз рекордини янгилагани ҳақида хабар берилганди. Сиёсатчилар Осиёдаги энг муваффақиятли иқтисодиётлардан бирининг асосида ётган ижтимоий муаммоларни олдинги қаторга олиб чиқиб, ушбу масалаларни ечишга уринди.
Корея Молия институти тадқиқотчиси Сон Мин Кининг айтишича, ўз жонига қасд қилиш ҳолатлари, одатда, иқтисодиёт яхши натижа кўрсатмаган пайтда кўпаяди. Ўтган йили иқтисодиёт пандемия давридаги пастлашлардан кейин тикланиб олган бўлса-да, энди ишсизлик даражаси 1999 йилдан буён энг юқори кўрсаткичга етди.
Бу йил иқтисодий пасайиш борасидаги хавотирлар ўсиб бормоқда, инфляцияни тийиб туриш учун фоиз ставкалари эса кўтарилмоқда, натижада уй хўжаликлари ва корхоналар молияларига тобора кўпроқ оғирлик тушмоқда.
Кореяда ўз жонига қасд қилиш даражасининг юқорилигига сабаб бўлувчи яна бошқа омиллар ҳам бўлиб, улар мактаб ва ишхонадаги босим, депрессия туфайли ёрдам сўраб мурожаат қилганлик учун уят ҳисси ва кекса кишиларга нисбатан ижтимоий ҳимоянинг йўқлигини ўз ичига олади, дейди экспертлар.
Изоҳ (0)