Финляндия ва Норвегия чегараларида рекорд даражадаги автомобиллар қайд этилди

Россияда қисман сафарбарлик бошланганидан кейин Финляндия ва Норвегияга кетаётган енгил автомобиллар сони рекорд ўрнатди, дея хабар беради «РБК». Финляндия чегарасидаги энг йирик автомобиль назорат пунктидан кунига 1000 дан ортиқ автомобиль ўтмоқда.

Федерал божхона хизмати 2022 йил бошидан буён Россиянинг шимоли-ғарбий қисмидаги 16 автомобиль чегара ўтказиш пунктларидан олтитасида рекорд миқдордаги автомобиллар ўтаётганини қайд этди. Агентлик маълумотларига кўра, жорий йилнинг 25 сентябрь куни соат 06:00 дан 26 сентябрь 06:00 гача бўлган даврда Россиядан Финляндия чегарасини кесиб ўтган энг кўп автомобиллар сони қуйидагича:

• «Торфяновка» автомобиль назорат пунктидан 1021 та автомобиль кесиб ўтган (аввалги рекорд 24 сентябрда 999 та эди).
• «Брусничное» - 986 (22 сентябрь - 890).
• «Светогорск» - 852 (23 сентябрь - 842).
• «Вяртсиля» - 486 (12 сентябрь - 423).
• «Лотта» - 29 та машина (одатда бу ерда кунига бешта машина чегарадан ўтади).
• Норвегия чегарасини «Борисоглебск» назорат пункти орқали 61 та машина кесиб ўтган, гарчи одатда бу нуқта орқали Россиядан кунига 20 га яқин машина чиқиб кетади.

Бундай рекордлар Россияда 21 сентябрь куни президент Владимир Путин эълон қилган қисман сафарбарлик фонида қайд этилган.

26 сентябрь куни соат 06:00 ҳолатига кўра, яна саккизта автомобиль назорат пунктида Россиядан чиқиш учун автомашиналар навбатлари қайд этилган. Энг катта тирбандлик Россия—Грузия чегарасида шаклланган — 2,5 минг автомобиль «Юқори Ларс» назорат пункти ҳудудида тўпланган (олдинги рекорд 24 сентябрда қайд этилган — 2 минг машина). Шу билан бирга, коронавирус чекловлари амал қилган 2022 йилнинг июлига қадар бу жойдаги автомобиллар сони бир неча баравар кам эди.