Бухорода аёл юк поезди остида қолди. У ўз жонига қасд қилган

Бухорода аёлни поезд босиб кетди. У ўз жонига қасд қилгани айтилмоқда, дея хабар берди «Дарё» мухбири.

Бухоро вилояти Транспорт департаменти масъул ходимининг таъкидлашича, жорий йилнинг 26 сентябрь куни тонги соат 06:00 ларда Жондор туманидан кесиб ўтувчи Бухоро—Мискин йўналишида ҳаракатланиб келаётган юк поезди олдига шахси номаълум аёл қўққисдан чиқиб келган. Оқибатда у юк поезди остида қолиб кетган.

«Бухоро—Мискин йўналишидаги 3043-поезднинг 2156-рақамли тепловози остида аёл қолиб кетган. Зудлик билан транспорт департаменти ҳамда ички ишлар органлари ходимлари воқеа жойига етиб келган. Аёл шахси ўрганилганда, унинг ўз жонига қасд қилгани аниқланган», — деди департамент масъул ходими.

Вилоят ИИБ ахборот хизмати раҳбари Шуҳрат Жалоловнинг сўзига кўра, аёл ҳақиқатан ҳам ўз жонига суиқасд қилган. Айни пайтда Бухоро транспорт прокуратураси томонидан терговга қадар текшириш ишлари олиб борилмоқда.