Қорақалпоғистонликлар эндиликда ҳудуд раҳбариятига Telegram-бот орқали мурожаат қилиши мумкин бўлди. Бу ҳақда Қорақалпоғистон Республикаси Жўқорғи Кенгес раиси Аманбай Ўринбаев маълум қилди, дея хабар берди «Дарё» мухбири.
Қайд этилишича, 25 сентябрь кунидан бошлаб Жўқорғи Кенгес раиси томонидан фуқароларнинг мурожаатларини қабул қилиш, уларнинг муаммоларини шахсан назоратига олинишини таъминлаш мақсадида Telegram-бот ишга туширилган.
«Биламан, бу ботнинг тўлиқ равишда ишлаб кетиши ҳам қийин. Сабаби ҳозир автоматлаштирилган дастурини тўлиқ ишлаб чиқишга улгурмадик. Ҳозирча ҳаммаси қўлда бошқарилади. Мурожаат ҳам кўпаяди. Бир ой кўпаяр, икки ой кўпаяр. Ишларни тўғри йўлга қўйсак, ҳаммаси яхши бўлади», — дейди Аманбай Ўринбаев.
Шунингдек, Жўқорғи Кенгес таркибида Мурожаатлар билан ишлаш ва Ижро тартибини назорат қилиш бўлимлари ҳам ташкил қилинган. Қорақалпоғистонни ижтимоий-иқтисодий ривожлантириш бўйича энг яхши таклиф эгаси йил якунида тақдирланиши эълон қилинган.
Изоҳ (0)