Тошкент шаҳри Миробод туманида фуқаронинг телефони ва пулларини куч ишлатиб олиб қўйган 3 киши қўлга олинди. Бу ҳақда Тергов департаменти ахборот хизмати хабар берди.
Қайд этилишича, 17 сентябрь куни Миробод тумани Қўйлиқ-1 даҳасида яшовчи 18 ёшли М.Ф. туман ИИО ФМБ бошлиғи номига ариза билан мурожаат қилган. Унда 16 сентябрдан 17 сентябрга ўтар кечаси соат 00:30 да Қўйлиқ-1 даҳаси ТХАЙ кўчасидаги метрополитеннинг 7-бекати яқинидан ўтиб кетаётган вақтида олдидан 3 нафар номаълум шахс чиқиб, ундан уяли телефонини гаплашиб олиш учун сўраб олганини, улардан бири унинг орқа томонидан келиб, оёғи билан тепиши оқибатида ерга йиқилганини билдирган.
Шу вақтда ушбу шахслар қўл ва оёқлари билан танасининг турли жойларига уриб-тепиб, унга тегишли бўлган 1,5 миллион сўмлик телефони, нархи 350 минг сўм бўлган AirPods қулоқчини ва 300 минг сўм нақд пулларини ўзлаштириб, воқеа жойидан яширинганини, шу сабабли ушбу шахсларга нисбатан қонуний чора кўришни сўраган.
Мазкур ҳолат юзасидан уларга нисбатан Миробод тумани ИИО ФМБ ҳузуридаги тергов бўлими томонидан Жиноят кодекснинг 164-моддаси 2-қисми «б» банди (босқинчилик) билан жиноят иши қўзғатилган.
Олиб борилган тергов-тезкор ишлари натижасида ушбу жиноятни Тошкент вилояти Янгийўл шаҳрида яшовчи 24 ёшли Й.Ш., 17 ёшли Қ.С. ва Сурхондарё вилояти Денов туманида яшовчи 17 ёшли Ч.Х. томонидан содир этилгани аниқланиб, улар процессуал тартибда ушланган.
Изоҳ (0)