Наманган вилояти божхона бошқармаси ва ДХХ ходимлари Поп туманида божхона назорати ўрнатилмаган айланма йўллар орқали ноқонуний равишда олиб кирилган товар-моддий бойликларини аниқлаш бўйича тезкор тадбир ўтказди. Бу ҳақда «Дарё» мухбири Азизбек Абдувалиев хабар бермоқда.
Тезкор тадбир давомида «Наманган—Тошкент» йўналишида харакатланаётган лаcетти русумли автомашина ҳайдовчиси Поп туманидаги «Наманган» мунтазам назорат масканида тўхтатилиб, холислар иштирокида кўздан кечирилганида автомашина салонидан хорижда ишлаб чиқарилган, ҳеч қандай ҳужжатлари бўлмаган жами 1 миллиард 516 миллион сўмлик 11 турдаги 361 дона Samsung ва Redmi русумли уяли телефонлар борлиги аниқланди.
Мазкур жараёнда олинган маълумотлар асосида тезкор тадбир давом эттирилиб, Янгиқўрғон тумани, «Мамай» маҳалласида яшовчи фуқаронинг хонадони ҳам кўздан кечирилди.
Бу ерда хорижда ишлаб чиқарилган ва ҳужжатлари бўлмаган 3 турдаги 189 миллион сўмлик 45 дона уяли телефон сақлаб келинаётганлиги аниқланди.
Мазкур ҳолат бўйича 14 турдаги жами 1 миллиард 705 миллион сўмлик 406 дона уяли телефон вақтинча сақловга олинди ва суриштирув ҳаракатлари олиб борилмоқда.
Мавзуга доир: Фарғонада четдан ноқонуний олиб кирилаётган 1 миллиард сўмлик телефонлар тўхтатиб қолинди
Изоҳ (0)