19 сентябрь куни Ўзбекистон ташқи ишлар вазири Владимир Норов БМТ бош Ассамблеясининг 77-сессияси доирасида Сербия ташқи ишлар вазири Никола Селакович билан учрашди. Бу ҳақда ТИВ ахборот хизмати хабар қилди.
Қайд этилишича, учрашув давомида сиёсат, савдо, инвестициялар, таълим соҳаларида икки томонлама ҳамкорликни ривожлантириш, шунингдек, маданий-гуманитар мулоқотни ривожлантириш масалалари муҳокама қилинган. Турли даражаларда ўтказилиши режалаштирилган тадбирлар ва ташрифларнинг алоҳида жиҳатлари ҳақида сўз борган.
Ўзбекистон ва Сербиянинг салмоқли савдо-иқтисодий салоҳиятидан самарали фойдаланиш мақсадида товарлар ассортиментини кенгайтириш, Ўзбекистон—Сербия ҳукуматлараро комиссиясини ташкил этиш ва унинг йиғилишини ўтказиш, қишлоқ хўжалиги, кимё саноати энергетика соҳаларида инвестиция лойиҳаларини амалга ошириш бўйича қўшма чора-тадбирларни амалга ошириш таклиф қилинган.
Инвестицияларни ҳимоя қилиш ва рағбатлантириш, меҳнат ресурсларини жалб қилиш, қишлоқ хўжалиги соҳасидаги ҳамкорлик, сертификатлаштириш, шунингдек, фан ва технологиялар соҳасидаги ўзаро ҳамкорлик бўйича қатор икки томонлама битимларни имзолаш масалаларини ишлаб чиқиш бўйича келишиб олинган.
Сербиялик инвесторларнинг Ўзбекистонда янги туризм инфратузилмасини қуриш ва мавжуд объектларини реконструкция қилиш лойиҳаларини амалга оширишда иштирок этиш имкониятлари кўриб чиқилган.
Олий ўқув юртлари ва илмий-тадқиқот институтлари, маданият ва соғлиқни сақлаш муассасалари ўртасидаги алоқаларни ривожлантиришдан Ўзбекистон ва Сербиянинг манфаатдорлиги қайд этилган.
Учрашув якунида Ўзбекистон ва Сербия Ташқи ишлар вазирликлари ўртасида Ҳамкорлик ва маслаҳатлашувлар тўғрисидаги протокол имзоланган. Ҳужжат икки мамлакат ташқи сиёсат идоралари ўртасида сиёсий маслаҳатлашувлар ўтказилишини тартибга солади.
Изоҳ (0)