19-sentabr kuni O‘zbekiston tashqi ishlar vaziri Vladimir Norov BMT bosh Assambleyasining 77-sessiyasi doirasida Serbiya tashqi ishlar vaziri Nikola Selakovich bilan uchrashdi. Bu haqda TIV axborot xizmati xabar qildi.
Qayd etilishicha, uchrashuv davomida siyosat, savdo, investitsiyalar, ta’lim sohalarida ikki tomonlama hamkorlikni rivojlantirish, shuningdek, madaniy-gumanitar muloqotni rivojlantirish masalalari muhokama qilingan. Turli darajalarda o‘tkazilishi rejalashtirilgan tadbirlar va tashriflarning alohida jihatlari haqida so‘z borgan.
O‘zbekiston va Serbiyaning salmoqli savdo-iqtisodiy salohiyatidan samarali foydalanish maqsadida tovarlar assortimentini kengaytirish, O‘zbekiston—Serbiya hukumatlararo komissiyasini tashkil etish va uning yig‘ilishini o‘tkazish, qishloq xo‘jaligi, kimyo sanoati energetika sohalarida investitsiya loyihalarini amalga oshirish bo‘yicha qo‘shma chora-tadbirlarni amalga oshirish taklif qilingan.
Investitsiyalarni himoya qilish va rag‘batlantirish, mehnat resurslarini jalb qilish, qishloq xo‘jaligi sohasidagi hamkorlik, sertifikatlashtirish, shuningdek, fan va texnologiyalar sohasidagi o‘zaro hamkorlik bo‘yicha qator ikki tomonlama bitimlarni imzolash masalalarini ishlab chiqish bo‘yicha kelishib olingan.
Serbiyalik investorlarning O‘zbekistonda yangi turizm infratuzilmasini qurish va mavjud obyektlarini rekonstruksiya qilish loyihalarini amalga oshirishda ishtirok etish imkoniyatlari ko‘rib chiqilgan.
Oliy o‘quv yurtlari va ilmiy-tadqiqot institutlari, madaniyat va sog‘liqni saqlash muassasalari o‘rtasidagi aloqalarni rivojlantirishdan O‘zbekiston va Serbiyaning manfaatdorligi qayd etilgan.
Uchrashuv yakunida O‘zbekiston va Serbiya Tashqi ishlar vazirliklari o‘rtasida Hamkorlik va maslahatlashuvlar to‘g‘risidagi protokol imzolangan. Hujjat ikki mamlakat tashqi siyosat idoralari o‘rtasida siyosiy maslahatlashuvlar o‘tkazilishini tartibga soladi.
Izoh (0)