Қозоғистон компаниялари санкцияларга тўлиқ амал қилиши айтиб ўтилди

Қозоғистондаги энг йирик компанияларни бошқарадиган жамғарма — «Самрук-Казина» санкция режимига тўлиқ амал қилишини ва санкцияларга тушиши мумкин бўлган лойиҳалардан чиқишга тайёрлигини маълум қилди. Бу ҳақда жамғарма бошқаруви раиси Алмасадам Саткалиев айтиб ўтди.

Жамғарма геосиёсий можаролар натижасида юзага келган барча санкцияларга тўлиқ амал қилади. Хусусан, биз ва бизнинг портфел компанияларимиз консалтинг, назорат ва фонд билан тузилган шартномаларни экспертиза қилишга ихтисослашган етакчи юридик фирмаларни жалб қилдик. Бу ҳар қандай санкциялардан, жумладан, иккинчи даражали санкциялардан қочиш учун қилинди, — дейди «Самрук-Казина» раиси.

Таъкидланишича, давлат жамғармаси санкция режимини бузадиган лойиҳалардан воз кечишга тайёр.

Саткалиевнинг сўзларига кўра, жамғарма компанияларга нисбатан санкциялар қўллаш хавфини олдини олиш мақсадида тартибга солувчи органлар, Ташқи ишлар вазирлиги, тегишли хизматлар ва АҚШ билан доимий алоқада бўлиб, дипломатик корпус, элчилар билан иш олиб боради. 

Қозоғистон Миллий фаровонлик жамғармаси «Самрук-Казина» 2008 йилда ташкил этилган. Жамғарма мамлакатнинг энг йирик стратегик компаниялари, жумладан Air Astana, «Қазахтелеком», «Казатомпром», «КазМунайГаз», «Казпост», «Қозоғистон темир йўли», Kegoc ва бошқаларни бошқаради.

Аввалроқ АҚШ Россия ва Марказий Осиё мамлакатлари иқтисодиётларини бир-биридан «ажратиш»га чақирган эди.