АПЛда август ойининг энг яхшилари аниқланди

Англия Премер Лигаси август ойининг энг яхшилари номини маълум қилди.

«Арсенал» устози Микель Артета Англия Премер Лигасининг август ойидаги энг яхши мураббийи деб эълон қилинди. Мутахассис қўл остида лондонликлар 5 ўйиннинг барчасида ғалаба қозонди.

Артетадан ташқари энг яхши мураббий бўлиш учун Антонио Конте («Тоттенҳэм»), Пеп Гвардиола («Манчестер Сити»), Грем Поттер («Брайтон»/«Челси») ва Марку Сильва («Фулҳэм») даъвогарлик қилган эди.

«Манчестер Сити» ҳужумчиси Эрлинг Ҳоланд август якунларига кўра, ойнинг энг яхши футболчиси деб топилди. Норвегиялик футболчи август ойида 5 ўйинда 9 та гол ва битта голли узатмани амалга оширди. 22 ёшли ҳужумчи АПЛда рекорд қайд этди. Бунга қадар Майкл Куин ва Серхио Агуэро Англия Чемпионатидаги стартида 5 ўйинда 8 тадан гол урган эди.

Шунингдек, Ҳоланд АПЛнинг икки ўйинда кетма-кет ҳет-трик қайд этган 2017 йилдан буён илк, тарихдаги олтинчи футболчига айланди. Эрлинг «Кристал Пэлас» (4:2) ва «Ноттингем Форест» (6:0) дарвозаларига учтадан гол урганди. 5 йил аввал «Тоттенҳэм» ҳужумчиси Ҳарри Кейн чемпионатнинг кетма-кет икки ўйинида ҳет-трик қайд этганди.

Ҳоланд — 2020 йил февраль ойидан буён АПЛдаги илк ойидаёқ энг яхши футболчи совринига эга чиққан биринчи футболчи бўлди. Ўшанда «Манчестер Юнайтед» ярим ҳимоячиси Бруну Фернандеш ушбу совринни қўлга киритган.

Ҳоланддан ташқари ушбу соврин учун Паскал Гросс («Брайтон»), Габриэль Жезус («Арсенал»), Александр Митрович («Фулҳэм»), Мартин Эдегор («Арсенал»), Ник Поуп («Ньюкасл»), Родриго («Лидс»), Уилфрид Заа («Кристал Пэлас») каби футболчилар кураш олиб борди.