Angliya Premyer Ligasi avgust oyining eng yaxshilari nomini ma’lum qildi.
“Arsenal” ustozi Mikel Arteta Angliya Premyer Ligasining avgust oyidagi eng yaxshi murabbiyi deb e’lon qilindi. Mutaxassis qo‘l ostida londonliklar 5 o‘yinning barchasida g‘alaba qozondi.
Artetadan tashqari eng yaxshi murabbiy bo‘lish uchun Antonio Konte (“Tottenhem”), Pep Gvardiola (“Manchester Siti”), Grem Potter (“Brayton”/“Chelsi”) va Marku Silva (“Fulhem”) da’vogarlik qilgan edi.
“Manchester Siti” hujumchisi Erling Holand avgust yakunlariga ko‘ra, oyning eng yaxshi futbolchisi deb topildi. Norvegiyalik futbolchi avgust oyida 5 o‘yinda 9 ta gol va bitta golli uzatmani amalga oshirdi. 22 yoshli hujumchi APLda rekord qayd etdi. Bunga qadar Maykl Kuin va Serxio Aguero Angliya Chempionatidagi startida 5 o‘yinda 8 tadan gol urgan edi.
Shuningdek, Holand APLning ikki o‘yinda ketma-ket het-trik qayd etgan 2017-yildan buyon ilk, tarixdagi oltinchi futbolchiga aylandi. Erling “Kristal Pelas” (4:2) va “Nottingem Forest” (6:0) darvozalariga uchtadan gol urgandi. 5 yil avval “Tottenhem” hujumchisi Harri Keyn chempionatning ketma-ket ikki o‘yinida het-trik qayd etgandi.
Holand — 2020-yil fevral oyidan buyon APLdagi ilk oyidayoq eng yaxshi futbolchi sovriniga ega chiqqan birinchi futbolchi bo‘ldi. O‘shanda “Manchester Yunayted” yarim himoyachisi Brunu Fernandesh ushbu sovrinni qo‘lga kiritgan.
Holanddan tashqari ushbu sovrin uchun Paskal Gross (“Brayton”), Gabriel Jezus (“Arsenal”), Aleksandr Mitrovich (“Fulhem”), Martin Edegor (“Arsenal”), Nik Poup (“Nyukasl”), Rodrigo (“Lids”), Uilfrid Zaa (“Kristal Pelas”) kabi futbolchilar kurash olib bordi.
Izoh (0)