Лимон 11 минг сўмга арзонлашди: сентябрь ойида Ўзбекистон бозорларида озиқ-овқат маҳсулотлари билан вазият қандай?
Ўзбекистонда 1—11 сентябрь кунлари бозорларда қишлоқ хўжалиги ва гўшт маҳсулотларининг улгуржи нархлари ҳақида маълумот берилди.
Ушбу давр мобайнида умумий қиймати 35,8 млн долларлик жами 45 минг тонна қишлоқ хўжалиги маҳсулотлари экспорти амалга оширилди. Бу ўтган йилнинг шу даврига нисбатан 4,5 минг тоннага кўп.
Маълумотларга кўра, сентябрь ойида пиёз 250 сўмга ва лимон 11 минг сўмга арзонлаган.
Мазкур даврда ташқи бозорларга:
- 21,3 минг тонна узум;
- 4,5 минг тонна қовун;
- 2,5 минг тонна ловия;
- 1,8 минг тонна хурмо;
- 1,5 минг тонна қуритилган мева;
- 1,3 минг тоннадан пиёз, анор ва нок;
- 1 минг тонна майиз;
- 0,9 минг тонна олхўри етказиб берилган.
Шунингдек, ушбу давр мобайнида 4,1 млн доллар (ўтган йилнинг мос даврига нисбатан 2,9 млн доллар кўп) қийматдаги жами 21,9 минг тонна (17,5 минг тонна кўп) қишлоқ хўжалиги маҳсулотлари, хусусан, 17,6 минг тонна банан, 2,4 минг тонна картошка, 230 тонна апельсин импорт қилинган.
«Қўйлиқ» бозорига 1—11 сентябрь кунлари ҳудудлардан жами 11 минг тонна, хусусан, 4,6 минг тонна картошка, 4,7 минг тонна пиёз, 328 тонна карам ва 1,3 минг тонна сабзи келтирилган.
Шунингдек, «Қўйлиқ» бозорига Қозоғистондан 1 457 тонна картошка ва 167 тонна пиёз келтирилган.
Шу билан бирга, ҳудудлардан «Чорсу» деҳқон бозорига 1—11 сентябрь кунлари жами 110,6 тонна, шу жумладан, 92,4 тонна мол гўшти ва 18,2 тонна қўй гўшти келтириб сотилган.
