Қонунчилик палатасида ЎзЛиДеП фракциясининг навбатдаги йиғилиши бўлиб ўтди. Унда бир қатор қонун лойиҳалари муҳокама қилинди.
Йиғилишда дастлаб Шавкат Мирзиёевнинг «Шанхай ҳамкорлик ташкилотининг Самарқанд саммити: ўзаро боғлиқликдаги дунёда мулоқот ва ҳамкорлик» сарлавҳали мақоласида билдирилган фикрларга тўхталиб ўтилди. Давлат раҳбарининг мазкур мақоласи дунё тамаддунининг бугунги воқелигига берилган ҳақиқий баҳо экани таъкидланди. Мақолада қуролли можаролар оқибатида издан чиқаётган савдо ва инвестиция оқимлари давлатлар иқтисодиётига жиддий таъсир этгани, бунинг оқибатида озиқ-овқат ва энергетика хавфсизлигини таъминлаш қийинлашаётгани қайд этилган.
Шундай сўнг фракция аъзолари «Ўзбекистон Республикасининг Уй-жой кодексини тасдиқлаш тўғрисида»ги Ўзбекистон қонунини қайта кўриб чиқди. Таъкидланганидек, қонунда биноларни турар жой сифатида таснифлаш, турар жойлар ва нотурар жойлар тоифасига ўтказиш, уй-жой фондини ҳисобга олиш ва турар жойларни фонддан чиқариш, давлат уй-жой назорати, хусусий уй-жой фондининг турар жойларидан фойдаланиш ҳамда мулкдорлар ҳуқуқларини ҳимоя қилиш кўзда тутилган. Бундан ташқари, ҳужжатда уй-жой қуриш, кўп хонадонли уйларни қайта қуриш ва қайта режалаштириш, фуқароларни турар жой билан таъминлаш, уй-жой кооперативларини ташкил этиш ва кооператив уйлардан турар жой олиш ва улардан фойдаланиш бўйича аниқ нормалар белгиланмоқда.
Шунингдек, йиғилишда «Ўзбекистон Республикасининг Давлат чегараси тўғрисида»ги қонун лойиҳаси иккинчи ўқишда муҳокама қилинди. 10 та боб ва 72 та моддадан иборат қонун лойиҳасида давлат чегарасини ўтказиш пунктлари орқали кесиб ўтаётган жисмоний шахсларнинг ҳуқуқ ва мажбуриятлари белгиланмоқда, давлат чегарасини қўриқлаш ва ҳимоя қилишда қурол-яроғ, ҳарбий техника, махсус воситалар, жисмоний куч ва хизмат ҳайвонларини қўллаш тартиби ўз аксини топган. Шунингдек, Давлат чегараси режими, Давлат чегараси режимини бузиш тушунчалари, унинг таснифланиши ва турлари белгиланмоқда.
Қайд этилганидек, мазкур қонун лойиҳасининг қабул қилиниши Ўзбекистон давлат чегарасини ишончли қўриқлаш ва ҳимоя қилишга, Ўзбекистон вазирлик ва идораларнинг давлат чегарасидаги ваколатларини тизимли равишда белгилаб берилишига хизмат қилади.
Изоҳ (0)