Бугун,

  • USD 11014.01
  • RUB 191.8
  • EUR 10674.78

Бухоро вилояти Суди раиси вилоятда 2022 йил олдинги йилларга нисбатан жиноятлар сони ошганини маълум қилди. Бу ҳақда «Дарё» мухбири хабар берди.

Фото: «Дарё»

Фото: «Дарё»

Таъкидланишича, Халқ депутатлари вилоят Кенгашининг олтмиш учинчи сессиясида вилоят суди раиси Лазиз Қодиров 2022 йилнинг биринчи ярмида одил судловни амалга ошириш борасида судлар томонидан амалга оширилган ишлар ҳақида ҳисобот берган.

«Вилоят судлари томонидан жорий йилнинг биринчи ярмида жами 1989 нафар шахсга нисбатан 1571 та жиноят иши кўриб чиқилган. Ўтган йилнинг биринчи ярмида эса 1312 нафар шахсга нисбатан 1056 та жиноят иши кўриб тамомланган эди. Бу кўрсаткич жиноятлар ўтган йилнинг шу даврига нисбатан 515 тага ёки 48,7 фоизга ошганлигини кўрсатади», — деди вилоят суди раиси.

Унинг сўзига кўра, вилоятда қасддан одам ўлдириш 5 тадан 9 тага, қасддан баданга ўртача оғир шикаст етказиш 40 тадан 63 тага, номусга тегиш 3 тадан 7 тага, ўзлаштириш ва растрата йўли билан талон-тарож қилиш 71 тадан 114 тага, фирибгарлик 211 тадан 302 тага, ўғрилик 191 тадан 293 тага, пора бериш 39 тадан 63 тага, безорилик жинояти 61 тадан 104 тага ошган. Вояга етмаган шахсни ғайриижтимоий хатти-ҳаракатларга жалб қилиш 7 тадан 5 тага, ҳақорат қилиш 37 тадан 34 тага, товламачилик 9 тадан 6 тага, меҳнатни муҳофаза қилиш қоидаларини бузиш 8 тадан 6 тага камайган.

«Судланганлик кўрсаткичи ортган, қасддан одам ўлдириш, қасддан баданга ўртача оғир шикаст етказиш, номусга тегиш, ўғрилик, безорилик жиноятларининг содир этилиш сабаблари таҳлил қилинди, ўрганилди. Аввало, ота-оналар, кейин маҳалла фуқаролар йиғинлари ва профилактика инспекторларининг ўзларига юклатилган вазифаларни сидқидилдан бажармагани боис, ушбу жиноятлар келиб чиққан. Сайёр судлар давомида улар ўзларига бириктирилган ҳудуддаги оилаларда юзага келган носоғлом вазиятни соғломлаштириш чораларини кўришмагани, фуқаролар билан ҳуқуқий тарбиявий ишлар етарли даражада олиб боришмагани, иш билан банд бўлмаган фуқароларни иш билан таъминлаш мақсадида ҳеч қандай амалий ишлар қилинмагани ойдинлашди. Бунинг натижасида вилоятнинг турли манзилларида янги жиноятлар сони ошиб кетган», — дейди Лазиз Қодиров.

Булардан ташқари, жиноят содир этган 1451 нафар шахсга нисбатан 1105 та ҳукм чиқарилган. Ҳукм чиқарилган ишлар сони 45,9 фоизга ошган. 1571 та жиноят ишининг 1275 таси ёки 81,2 фоизи бўйича хусусий ажримлар чиқарилган.

Изоҳ
Асосий янгиликлар