Андижонда 21 ёшли таксичи йўл талашиб, 54 ёшли фуқарога чопқи билан оғир тан жароҳати етказди
Андижонда 21 ёшли таксичи йигит у билан йўловчи талашган 54 ёшли фуқарога чопқи билан оғир тан жароҳати етказди. Воқеа 2022 йил 9 сентябрь куни Қўрғонтепа тумани марказидаги Қўрғонтепа—Норбўта йўналишида таксилар турадиган жойда содир бўлган. Бу ҳақда «Дарё» мухбири хабар бермоқда.
Маълум қилинишича, 9 сентябрь куни соат 10:00 лар атрофида Damas ҳайдовчилари — «Норбўта» маҳалласида яшовчи 2001 йилда туғилган йигит ва 1968 йилда туғилган эркак ўз йўналиши бўйича бирин-кетин кетаётган вақтида йўловчи олиш мақсадида йўл талашган. Натижада иккаласи ўртасида низо келиб чиққан. Эркак томонидан ҳақоратли сўзлар ишлатилган. Оқибатда 2001 йилда туғилган фуқаро дўкондан чопқи сотиб олиб, автомашиналар турган жойга бориб, чопқининг ўткир қисми билан 54 ёшли эркакка оғир тан жароҳати етказган. Шифокорларнинг кўрсатган тиббий ёрдами билан жабрланувчининг ҳаёти сақлаб қолинган бўлса-да, оғир аҳволда туман шошилинч тиббий ёрдам бўлимига ётқизилган.
Ушбу ҳолат бўйича Қўрғонтепа туман прокуратураси томонидан Жиноят кодексининг 97-моддаси (қасддан одам ўлдириш) билан жиноят иши қўзғатилган. Ҳозирда тергов ҳаракатлари олиб борилмоқда.
10 сентябрь куни Андижон вилояти прокурори Сирожиддин Эшқувватов бошчилигида тумандаги сектор раҳбарлари, масъуллар ва ҳудуд аҳолиси иштирокида ҳодиса муҳокамаси ўтказилган. Унда сўнгги пайтларда содир бўлаётган жиноятларнинг аксарият қисми арзимас сабаблар ортидан юзага келаётгани, бу каби жиноятлар такрорланмаслиги учун ҳуқуқ-тартибот идоралари ва фуқароларнинг ўзаро ҳамкорлиги зарурлиги ҳақида сўз борган.
«Арзимаган беш минг сўм учун мана шундай ҳолатнинг юзага келиши ачинарли. Аслида арзимаган дейишимиз ҳам нотўғри. Боиси иккаласи ҳам ҳаёт кечириши, бола-чақасини боқиш, оиласига даромад қилиш учун ҳаракат қилган. Лекин шу бир фуқарони йўл-йўлакай олиб бориб қўйишгача тўланадиган 5 минг сўм учун бўлаётган ҳолат оқибатида битта инсон шифохонада аҳволи оғир ҳолатда ётишга, иккинчи фуқаро эса қотиллик суиқасд жинояти учун иш бўйича терговга жалб қилинган», — дейди вилоят прокурори Сирожиддин Эшқувватов.
