Фарғона вилояти Ўзбекистон туманида 21 июль куни бахтсиз ҳодиса оқибатида 23-сонли давлат мактабгача таълим ташкилотининг 4 ёшли тарбияланувчиси вафот этди. Бу ҳақда Мактабгача таълим вазирлиги ахборот хизмати хабар берди.
Мазкур маълумот вазирликка келиб тушиши биланоқ барча ҳолатларга ойдинлик киритиш мақсадида зудлик билан комплекс текшириш ишлари бошланган. Текширув давомида ушбу ташкилот ходимлари касбий фаолияти жараёнида қўпол қоидабузарликларга йўл қўйгани аниқланди. Жумладан, улар болаларнинг боғча ҳудудидан рухсатсиз чиқиб кетишига бепарво қараган.
Бахтсиз ҳодиса содир бўлган кун соат тахминан 08:30 да болани катта опаси 23-сонли ДМТТ тарбияловчилари ихтиёрига олиб келиб ташлаб кетган. Орадан маълум вақт ўтгач, мазкур мактабгача таълим ташкилоти тарбиячилари ва раҳбарининг бепарво ва лоқайд муносабати оқибатида тарбияланувчи МТТ ҳудудидан рухсатсиз чиқиб, опасининг орқасидан югурган. Ҳаракат оқибатида бахтсиз тасодиф билан сирпаниб, уйи яқинидан оқиб ўтувчи «Собиржон» дарёсига йиқилиб тушиб, чўкиб кетган.
Мактабгача таълим вазирлиги ишчи гуруҳи томонидан ўтказилган текшириш жараёнида бола боғча ҳудудидан бир неча бор рухсатсиз чиқиб кетгани, бироқ боғча ходимлари буни юқори идоралардан яшириб, бундан ҳеч қандай хулоса чиқармагани маълум бўлди.
Юқоридаги ҳолатлар инобатга олиниб, ташкилот педагоглари ва раҳбарининг эҳтиётсизлиги ҳамда лоқайд муносабати боланинг ўлимига сабаб бўлгани, шунингдек, ушбу мактабгача таълим муассасаси раҳбарининг фаолиятини ташкил этишда бир қатор бошқа ҳуқуқбузарликлар аниқланди ва барча материаллар зудлик билан ҳуқуқни муҳофаза қилиш органларига юборилди.
Натижада ҳуқуқни муҳофаза қилиш органлари томонидан ушбу мактабгача таълим ташкилотининг барча мансабдор шахслари ва ходимларига нисбатан Жиноят кодексининг 116-моддаси (касб юзасидан ўз вазифаларини лозим даражада бажармаслик) 3-қисми билан терговга қадар жиноят иши қўзғатилди.
Изоҳ (0)