Таъмирлаш ишлари туфайли 6 сентябрь куни Тошкент вилояти Зангиота туманида газ таъминоти вақтинча тўхтатилади. Бу ҳақда «Ҳудудгазтаъминот» акциядорлик жамияти хабар қилди.
Қайд этилишича, 2022—2023 йиллар куз-қиш мавсумига газ тармоқларини барқарор ишлашини таъминлаш мақсадида «Жанубий-Ғарбий» ва «Бўзсув-2» ГЦлари орқали табиий газ билан таъминланадиган ҳудудлардаги мавжуд юқори ва ўрта босимли газ қувурларини лойиҳавий босимга кўтариб зичликка ва мустаҳкамликка синаш ишлари олиб борилади.
Шу сабабли 6 сентябрь куни соат 08:00 дан 9 сентябрь соат 17:00 га қадар тумандаги «Ўртаовул», «Эркин», «Қатортол», «Бўзсув» ва «Туркистон» ҳудудларидаги жами 27040 та аҳоли хонадонларида, 780 та табиий газ улгуржи истеъмолчиларида ва 93 та ижтимоий соҳа объектларида табиий газ таъминоти вақтинчалик тўхтатилади.
«Таъмирлаш ишлари туфайли етказилаётган ноқулайликлар учун аҳолимиз ва газ истеъмолчиларидан узр сўраймиз», — дейилади хабарда.
Изоҳ (0)