ДХХнинг Сурхондарё вилояти бўйича бошқармаси ходимлари томонидан гиёҳванд моддаларнинг ноқонуний айланмасига қарши курашиш доирасида бир нечта тезкор тадбирлар ўтказилди, деб хабар бермоқда ЎзА.
Жумладан, Тошкент шаҳрининг Чилонзор тумани ҳудудида Matiz тўхтатилиб, кўздан кечирилганда, унда йўловчи сифатида кетаётган 2 нафар хорижий фуқарога тегишли 23 килограмм 52 грамм «опий» ва 30 килограмм 122 грамм «гашиш» гиёҳвандлик воситалари борлиги аниқланиб, процессуал тартибда расмийлаштириб олинган.
Маълум бўлишича, ушбу гиёҳванд моддалар афғонистонлик наркокурьерлар томонидан контрабанда йўли билан Ўзбекистонга ўтказилган.
Бошқа бир ҳолатда эса муқаддам хорижда оғир жиноят содир этгани учун қамоқ жазосини ўтаган, Денов туманида яшовчи, 1966 йилда туғилган фуқаро бошқарувидаги Lacetti Термиз шаҳрида тўхтатилиб кўздан кечирилганда, унда ҳам афғонистонлик наркосавдогарлар томонидан юборилган 39 килограмм 520 грамм гашиш моддаси борлиги аниқланган.
Учинчи ҳолатда эса Денов шаҳрида яшовчи, муқаддам гиёҳвандлик воситалари билан боғлиқ жиноят содир этгани учун судланган, 1967 йилда туғилган шахс ўзининг яшаш хонадонида 2 килограмм 396 грамм опий моддасини келгусида сотиш мақсадида сақлаб келаётгани аниқланиб, ўрнатилган тартибда расмийлаштириб олинган.
Қайд этилишича, ўтказилган тезкор тадбирлар натижасида жами 25 килограмм 448 грамм опий ва 69 килограмм 642 грамм гашиш гиёҳвандлик воситалари мусодара қилинган.
Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)