Хоразм вилояти ИИБ интернетдаги қизлар жангига изоҳ бериб, воқеа Қорақалпоғистонда рўй берганини маълум қилди

Кеча ижтимоий тармоқларда бир қиз бошқа қизни уриб, уни «самосуд» қилгани тасвирланган видео тарқалди. Хоразм вилояти ИИБ ахборот хизмати қизлар жанги ҳақида тўхталиб, воқеа Хоразмда эмас, Қорақалпоғистон Республикасининг Элликқалъа туманида содир бўлганини очиқлади.

«Бу юзасидан Қорақалпоғистон Республикаси ИИВ ижтимоий тармоқлардаги ўзининг расмий саҳифалари орқали шу куннинг ўзида, яъни 2 сентябрь куни, хотин-қизлар ўртасидаги ушбу жанжалли ҳолат Қорақалпоғистон Республикасининг Элликқалъа туманида содир бўлганлиги ва ҳозирги кунда терговга қадар текширув ҳаракатлари олиб борилаётганлиги тўғрисида хабар берган бўлса-да, бирор-бир интернет-нашр ушбу хабарга эътибор қаратмаган», — дейилади вилоят ИИБ ахборот хизмати маълумотида.

Қорақалпоғистон ИИВ расмий каналида эса воқеа 2022 йилнинг 10 август куни содир бўлгани маълум қилинган.

«Жорий йилнинг 10 август куни соат 17:00 ларда Элликқалъа тумани, Қ.Нурумбетов кўчаси, 54-уйда яшовчи, 2002 йилда туғилган Б.З. Элликқалъа тумани марказий деҳқон бозорининг жанубий томонида жойлашган дўконлар олдида жамиятда ўрнатилган юриш-туриш қоидаларни қасддан менсимасдан, безорилик жиноятини содир қилиш мақсадида Элликқалъа тумани, А.Темур кўчасида яшовчи, 2005 йилда туғилган Ш.Л. билан ўрталарида келиб чиққан келишмовчиликларни ўзаро мустақил ҳал қилишни хоҳлаб, атрофдаги одамларнинг кўз олдида Ш.Л.нинг танасининг кўплаб жойларига қўл ва оёқлари билан бир неча маротаба уриб, тепиб қасддан безорилик жиноятини содир қилган», — дейилади ИИВ ахборот хизмати хабарида.

Қўшимча қилинишича, мазкур ҳолат бўйича Элликқалъа тумани ИИБ ҳузуридаги Тергов гуруҳи томонидан терговга қадар суриштирув ишлари олиб борилмоқда.