Россияда 15 нафар Ўзбекистон фуқаросининг ҳуқуқи тикланди. Бу ҳақда Ташқи меҳнат миграцияси агентлиги хабар берди.
Маълум бўлишича, Россия пойтахтидаги «Электро Сити Свет» қурилиш корхонасида ишлаётган 15 нафар фуқаронинг май, июнь, июль ойлари учун иш ҳақи тўланмагани ҳақида мурожаат келиб тушган.
Ушбу мурожаат юзасидан Ташқи меҳнат миграцияси агентлигининг Москва шаҳридаги ваколатхонаси негизидаги Меҳнат мигрантларининг мурожаатлари билан ишлаш ва уларга ҳуқуқий кўмаклашиш маркази ходимлари иш берувчи билан музокара ўтказди. Натижада фуқароларнинг 1,5 ой учун (май ойи тўлиқ ва июнь ойининг ярми) 1 миллион 50 минг рубль иш ҳақи ундириб берилди.
Иш берувчи қолган қарздорликни 10 сентябрга қадар тўлаб беришини ваъда қилди. Айни пайтда фуқаролар ушбу корхонада меҳнат фаолиятини амалга оширмоқда.
Изоҳ (0)