Ижтимоий тармоқларда Самарқанд тумани «Мотруд» МФЙ ҳудудида жойлашган IV–V асрларга оид «Қундуз сўфи» объекти бузиб юборилаётгани ҳақида хабар тарқалди. Маданий мерос агентлиги ҳолат юзасидан расмий муносабат билдирди.
Қайд этилишича, Яҳё Ғуломов номидаги Самарқанд археология институтининг хулосаларига таянган ҳолда Маданий мерос агентлиги томонидан қуйидагилар маълум бўлди. Мурожаатда белгиланган қурилиш олиб борилаётган жой ўрганилганда у Зарафшон дарёсининг чап қирғоғи терассасининг биринчи қатлами ва геологик тупроқ ётқизиқларидан иборат ҳудуд экани аниқланди. Қурилиш майдонида ва унга туташ ҳудудда археологик қатлам излари қайд этилмади.
Қурилиш олиб борилаётган жой «Қундуз сўфи» археология объектининг муҳофаза зонасидан 70–100 метр узоқликда жойлашган.
Шу ўринда жамоатчилик вакиллари, блогерлар ва оммавий ахборот воситаларидан ўрганилмаган, асоссиз маълумотлар билан аҳолини чалғитмасликларини сўраб қоламиз, зеро аҳоли ўртасида ёлғон ахборот тарқатганлик учун жавобгарлик мавжуд, — дейилади агентлик хабарида.
Изоҳ (0)