Таниқли актёр Фарҳод Бадалов ўз ҳамкасби томонидан пичоқланди

Аввалроқ Тошкент шаҳри Олмазор тумани судида 25 август куни Маданият вазирлиги ходимларининг пичоқлашуви юзасидан суд мажлиси бўлиб ўтгани хабар бергандик.

Қайд этилишича, жиноят 8 апрель куни Олмазор тумани Тахтапул дарвоза кўчасида жойлашган чойхонада содир бўлган. Маданият вазирлигининг спорт тарғибот касаба уюшмасининг 38 ёшли раиси лавозимида ишлаган шахс ва ҳамкасби таниқли актёр ва продюсер Фарҳод Бадалов иштирокида жанжал юзага келган ва ҳолат пичоқбозлик билан якунланган. Улар чойхонага Рамазон ойининг еттинчи куни ифторлик қилиш учун келишган бўлган.

Ишхонадаги тадбирларни уюштириб турардим. Ўша вақтда кимдир раҳбариятдан одам келди, деди. Кутиб олгани чиқиб кетаётганимда, у сўкиниб ҳақоратли гапларни айтди. «Нима қилаяпсан, деб қараганимда», мени бир-икки марта уриб юборди. Бўйлари баланд бўлгани учун ўзимни йўқотиб қўйдим. Кучли руҳий ҳаяжонда қандай қилиб пичоқни олиб унга санчиб қўйганимни билмай қолдим. Кейин болалар келиб қолди ва уни даволатгани олиб бордик. Менга уни ўлдириб қўйдинг, дейишганди. Ўша пайтда сочларимга оқ тушиб кетди. Икки марта ўз жонимга қасд қилишга ҳаракат қилдим, камерадошларим қутқариб қолишди. Қилган ишимдан пушаймонман. Тўрт ярим-беш ойдан буён турмадаман. Бу вақтда жуда кўп нарсани йўқотдим. Турмада кўзим очилди, — дейди судланувчи суд залида.

Жиноят ишлари бўйича Олмазор туман суди мазкур ишни кўриб чиққан. Унда келтирилган маълумотларга кўра, судланувчи бу ҳаракатлари билан Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш) орқали 97-моддаси (қасддан одам ўлдириш) 1- қисмида назарда тутилган жиноятни содир этган.

Эслатиб ўтамиз, жабрланувчи Фарҳод Бадалов актёр ва продюсер ҳисобланади. Хонанда Баҳром Назаровнинг ижрочи продюсери бўлиб ишлаган ва унинг «Пари» клипида суратга тушган. «Мендирман Жалолиддин» сериалида эса картина директори вазифасини бажармоқда.

Мавзуга доир: Тошкентда санъаткор ўз ҳамкасбини пичоқлаб ўлдирди