Ҳозирда 76 ёшда бўлган Голливуд юлдузи Силвестр Сталлоне 25 йилдан бери бирга яшайдиган рафиқаси Женнифер Флавин билан ажрашмоқда. Актёр Instagram’даги саҳифасида рафиқасининг портретини тўсиб қўйган янги татуировкасини эълон қилди. Татуировка устига актёр «Рокки» фильмида унинг ити бўлган булмастиф Буткуснинг тумшуғи суратини чиздирган. Сталлоненинг рафиқаси бу ҳолатни эътиборсиз қолдирмади ва актёрнинг ижтимоий тармоқлардаги саҳифаларини тарк этди.
Сталлоне нима учун янги татуировка қилдирди?
Актёр рафиқасининг портретини севимли ити Буткус тасвири билан қоплаган. Daily Mail нашри Сталлоне ва Флавин ўртасидаги муносабатлар ёмонлашганини, шу сабабдан актёр рафиқасининг суратини елкасидан олиб ташлашга қарор қилганини тахмин қилмоқда. Ушбу мулоҳазанинг тасдиғи сифатида қайд этилган маълумот шуки, Флавин ҳақиқатан ҳам ижтимоий тармоқларда актёрга обунасини бекор қилган.
Бироқ актёрнинг пиар менежери Сталлоненинг турмуш ўртоғи билан муносабатлари ёмонлашганини рад этди. «Сталлоне рафиқаси Женнифернинг татуировкасини янгиламоқчи эди, аммо натижалар қониқарсиз бўлди ва афсуски, уни тузатиб бўлмади. Натижада у асл тасвирни севимли итининг татуировкаси билан ёпишга мажбур бўлди», — деб тушунтирди актёрнинг вакили.
Актёрнинг рафиқаси билан муносабатлари ёмонлашганми?
Юқорида айтиб ўтилганидек, актёрнинг рафиқаси бу имо-ишорани қадрламади ва ижтимоий тармоқларда турмуш ўртоғига бўлган обунасини бекор қилди. Ҳозир 54 ёшда бўлган Флавин актёрнинг бу ишига уч қизини қучоқлаб ўтирган суратини ижтимоий тармоққа жойлаш орқали муносабат билдирди.
У сурат остига қуйидагича: «Бу қизлар — ҳаётим мазмунлари. Бошқа ҳеч нарса муҳим эмас. Тўртталамиз — абадий биргамиз», — деб изоҳ қолдирган.
Бироқ Сталлоненинг вакили уларнинг ажрашиши ҳақидаги миш-мишларни рад этди: «Жаноб Сталлоне ўз оиласини яхши кўради. У ҳозирда турмуш ўртоғи билан Paramount’да реалити-шоуни бирга суратга олмоқда», — деди.
Изоҳ (0)