Ўн икки йилдан бери алимент тўламай келган бухоролик отага қидирув эълон қилинди

«Дарё»да 12 йилдан бери алимент ололмай, сарсон бўлиб келаётган аёл муаммоси эълон қилинганди. МИБнинг вилоят бошқармаси ахборот хизматининг хабар беришича, қарздор отага қидирув эълон қилинган.

Мақолада бухоролик аёл — Дилором Жўраева собиқ турмуш ўртоғи Ф.Б. икки нафар фарзанди таъминоти учун алимент тўламай келгани, бир неча йилдан буён мурожаат қилса-да, бунга МИБнинг Бухоро шаҳар бўлими ижрочилари панжа ортидан қараб келаётгани ҳақида ёзилганди.

Олиб борилган суриштирувга кўра, Дилором Жўраевага фарзандлари таъминоти учун 2014 йилнинг ноябридан 2022 йилнинг июнига қадар бўлган давр учун собиқ эридан 82 миллион 64 минг 508 сўм маблағ ундирилиши кераклиги маълум бўлган. «Дарё» суриштируви жараёнида ҳақиқат ҳам 12 йилдан буён ушбу қарздорлик ундируви эътибордан четда қолиб кетгани аниқланди. Жорий йилнинг 15 август куни ҳолатга оид барча иш ҳужжатлари чуқур ўрганилди. Давлат ижрочиси ташаббуси билан 2014 йилдан буён алимент тўламай келган қарздорга нисбатан қидирув эълон қилинди. Қидирув ишлари Бухоро шаҳар ИИБ қидирув бўлими томонидан амалга оширилади, — деди вилоят МИБ бошқармаси ахборот хизмати раҳбари Ихтиёр Олимов.