«Автомобильларга газни белгиланган миқдордан ортиқ қуйиш ҳолатларига бир неча бор гувоҳ бўлдик» —  сенатор

Ўзбекистонда автотранспорт воситаларига ўрнатилаётган газ баллонларининг 70 фоизи Хитой Халқ Республикасида ишлаб чиқарилган бўлиб, уларнинг аксариятининг кафолати йўқ. Бу ҳақда Олий Мажлис Сенатининг Мудофаа ва хавфсизлик масалалари қўмитаси раиси Қутбиддин Бурхонов «Дарё» мухбири Мусулмонбек Иброҳимовга берган интервьюсида айтиб ўтди.

Қутбиддин Бурхоновнинг таъкидлашича, ўрганишлар натижасида тез ҳолатларда портлаб кетиши мумкин бўлган газ баллонлардан рухсатсиз фойдаланиб келинаётган ҳолатлар аниқланган.

«Ўрганиш натижаси яна шуни кўрсатдики, бугунги кунда ўрнатилаётган газ баллонларининг 70 фоизи Хитой Халқ Республикасида ишлаб чиқарилган бўлиб, уларнинг аксариятининг кафолати йўқ. Демак, булар бизнинг хавфсизлик талабларимизга тўлиқ жавоб бермайди», — деди сенатор.

Ишчи гуруҳ кузатувларида жуда кўп такрорланадиган салбий ҳолат, яъни белгиланган миқдордан кўпроқ газ тўлдириш ҳолатларига дуч келинган.

«Биринчи навбатда, халқимизнинг, айниқса, автомобиль ҳайдовчиларининг онги бўлиши керак. Бу нафақат ўзини, ўзгаларнинг ҳам ҳаётини хавф остига қўйяпти. Мана, бир нечта газ баллонлари билан портлаш ҳолатлари бўлди. Бунинг ичида бир қанча фуқароларимиз оғир тан жароҳатлари олди ва ўндан ортиқ фуқароларимиз, минг афсуслар бўлсинки, ҳаётдан кўз юмган ҳолатлар бўлди», — деди Қутбиддин Бурхонов.

Эслатиб ўтамиз, Олий Мажлис Сенати газ баллонлари ўрнатилган транспортларнинг хавфсизлиги бўйича ҳукуматга сўров юборган.

Аввалроқ Сирдарё вилоятининг  Оқолтин туманида Isuzu автобуси газ баллони портлашидан 6 киши ҳалок бўлгани ҳақида хабар берилган эди.