Ўзбекистонда 2022 йилнинг июль ойида сўмнинг реал самарали алмашув курси ўтган ойга нисбатан ўсувчи динамика қайд этиб, 2,1 фоизга мустаҳкамланди. Бу ҳақда Марказий банк шарҳидан маълум бўлди.
Июнь ойида сўм 0,2 фоизга қадрсизланган эди.
Сўм 2021 йил мос даврига нисбатан 1,4 фоизга, базавий ой — 2019 йилнинг сентябрига нисбатан 5 фоизга мустаҳкамланди.
Валюта бозорини янада эркинлаштириш бўйича чора-тадбирларни амалга ошириш доирасида 2019 йил 20 августдан бошлаб банклар томонидан нақд хорижий валютани сотиш йўлга қўйилди. Шу сабабли, 2019 йил сентябрь ойи сўмнинг реал самарали алмашув курси индексини ҳисоблашда базавий давр сифатида белгиланди.
Реал самарали алмашув курси ташқи савдо айланмаси, инфляция даражаси ва асосий савдо ҳамкорларининг валюта курсларидаги ўзгаришларни акс эттирувчи кўрсаткичдир.
Июль ойидаги реал самарали алмашув курсининг мустаҳкамланиши асосан валюта курсидаги ўзгаришларнинг таъсири билан изоҳлаш мумкин, — дейди Марказий банк.
Ўтган ойда реал самарали алмашув курси индекси динамикасида:
оширувчи омиллар:
- савдо-ҳамкор давлатлар валюта курслари ўзгариши — 2,6 фоиз банд;
- сўм алмашув курси — 0,3 фоиз банд.
пасайтирувчи омил:
- савдо-ҳамкор давлатлар инфляцияси — 0,7 фоиз банд;
- ички инфляция — 0,1 фоиз бандни ташкил этди.
Асосий савдо-ҳамкор давлатларнинг валюталари курси июль ойи давомида долларга нисбатан қадрсизланишда давом этди.
Сўмга бошқа давлатлар валюта курслари ўзгариши ҳам таъсир қилади.
Россия рубли июль ойида 3,7 фоизга (57,3 дан 59,4 га) қадрсизланди.
Бундай қадрсизланишга Россия Марказий банки томонидан йилнинг биринчи чорагида киритилган валюта чекловларининг босқичма-босқич юмшатилиши ҳамда импортнинг тикланиши натижасида хорижий валютага бўлган талабнинг ошиши билан изоҳланади.
Россия Марказий банки 22 июль куни асосий фоиз ставкасини 9,5 фоиздан 8 фоизгача пасайтирди.
Қозоғистон тенгеси июль ойида 6,7 фоизга (446,4 дан 476,3 га) қадрсизланди.
Йирик компаниялар томонидан дивидендларни репатриация қилиниши ҳамда бир вақтнинг ўзида валютага бўлган талабнинг юқорилиги фонида тенге курсининг бироз қадри пасайди.
Қозоғистон Марказий банки 25 июлда асосий фоиз ставкасини 14,5 фоизгача кўтарди.
Мазкур ой давомида ҳам турк лирасининг қадрсизланиш суръатлари (2,8 фоизга) сақланиб қолди.
Доллар индексининг мустаҳкамланиши ҳамда жаҳонда рецессия хавфи лиранинг қадрсизланишига сабаб бўлди.
Хитой банкининг иқтисодиётни қўллаб-қувватлаш мақсадида йил бошидан буён асосий фоиз ставкани тушириши ҳамда минтақадаги сўнгги геосиёсий нотинч вазиятнинг мавжудилиги юань курсига ҳам салбий таъсир кўрсатди.
Бунинг натижасида юань курси июль ойида ўтган ойга нисбатан 0,6 фоизга қадрсизланди.
2022 йил июль ойида асосий савдо-ҳамкор давлатларнинг деярли барчасида йиллик инфляция кўрсаткичлари ошиши кузатилди.
Россияда ойлик нархлар пасайиши давом этиб, -0,2 фоизни (йиллик инфляция 15,3 фоизни) ташкил этиши прогноз қилинмоқда.
Нархларнинг ойлик динамикаси мавсумий омиллар, истеъмол товарларига бўлган талабнинг сустлиги билан изоҳлаш мумкин.
Қозоғистонда ойлик инфляция 1,1 фоизни ташкил этиб, йиллик ҳисобда 15 фоизгача тезлашди.
Июль ойида инфляциянинг ошишига озиқ-овқат маҳсулотлари нархининг қимматлашиши (йиллик 19,7 фоизга) сезиларли ҳисса қўшди.
Туркияда ойлик инфляция 2,8 фоизни ташкил этди, йиллик ҳисобда 79,6 фоизгача ўсди. Нархлар ўсишига асосан, энергия маҳсулотларининг қимматлашиши ҳамда лира девальвациясининг давом этаётганлиги сезиларли таъсир кўрсатган.
Шунингдек, мамлакатда ишлаб чиқарувчилар нархлари индекси ойлик ҳисобда 5,2 фоизга ўсиб, йиллик 144,6 фоизга етди.
Изоҳ (0)