Ўзбекистонда 2022 йилнинг етти ойида ипотека кредитлари асосан 31-50 ёшдаги мижозларга берилган

Марказий банк 2022 йилнинг 7 ойида аҳолига ажратилган ипотека кредитлари бўйича маълумот берди.

Унга кўра, аҳолига ажратилган ипотека кредитлари қолдиғи 2017 йилга қараганда 5,4 баробарга кўпайиб, жорий йилда 41,3 трлн сўмга етган. 

Тошкент шаҳри 2022 йилда ажратилаётган ипотека кредитлари бўйича қолган вилоятларга қараганда бир неча бор олдинда бормоқда — 2,3 трлн сўм. Бу борада 670 млрд сўм кўрсаткич билан Фарғона кейинги ўринда қайд этилган. 

Кредитларнинг 79 фоизи янги қурилган — бирламчи бозордаги уйларга ажратилган. Йил бошидан бери 41 мингдан ортиқ фуқарога ипотека кредитлари берилган. 

Кредит расмийлаштираётган мижозларнинг 59 фоизини эркаклар, 41 фоизини аёллар ташкил этган. Ипотека кредитларининг асосий қисмини 31-50 ёш оралиғидаги фуқаролар олмоқда — 70 фоиз. 

Йил бошидан бери ипотека кредитларининг молиялаштириш манбалари:

• Молия вазирлиги — 5,6 трлн сўм;
• Банк ўз маблағлари —  1,8 трлн сўм;
• Ипотекани қайта молиялаштириш манбалари — 95 млрд сўм.

Банклар томонидан ажратиладиган ипотека кредитларининг ўртача фоиз ставкаси йил бошидан бери 1,8 фоизга юқорилаб, ҳозирда 24,2 фоиз бўлиб турибди.

Янги тартиб доирасида ажратилган ипотека кредитлари эса 2022 йилда деярли ўзгармаган — 17,3 фоиз.