Шавкат Мирзиёев 12 август куни Тошкент вилойти Бекобод шаҳрига ташрифи давомида «Металлург» футбол клуби қошидаги «Эл Голазо» футбол академиясида бўлди. Бу ҳақда Президент матбуот хизмати хабар қилди.
Қайд этилишича, ушбу мактаб Испаниянинг таниқли «Реал Мадрид» клуби жамғармаси кўмагида ташкил этилган бўлиб, ўтган йили октябрда фаолият бошлаган. Табиий ва сунъий чимли стадионлар, фитнес зали, ўқув бинолари ва ётоқхонада замонавий шароитлар яратилган. Ўқув-машғулотлари «Реал Мадрид» футбол клуби анъаналарига мос равишда олиб борилади. Мураббийларнинг уч нафари испаниялик.
Бугунги кунда академияда 200 нафардан ортиқ ўқувчи сабоқ олмоқда. Бу ерда ўқиш истагидаги ёшлар кўп. Шу боис 11 ёшдан 17 ёшгача болалар танлов асосида қабул қилинади. Яқинда 48 нафар иқтидорли тарбияланувчи Испанияда маҳорат ошириб келган.
Давлат раҳбари академияда яратилган шароитларни кўздан кечирган, болалар билан суҳбатлашган.
«Шундай замонавий шароитларда ўқиётганингиз, ёниб турган кўзларингизни кўриб, хурсанд бўлдим. Келгусида сизлардан машҳур футболчилар, чемпионлар етишиб чиқишига ишонаман. Энг муҳими, соғлом бўлиб улғаясиз, фарзандларингизни ҳам спортга ошно қилиб тарбиялайсиз. Мақсадимиз — ёшлар ўртасида ана шундай муҳитни шакллантириш», — дейди президент.Давлат раҳбари мутасаддиларга бу футбол мактаби тажрибасини оммалаштириш бўйича кўрсатма берган.
Бекободлик нуронийлар, секторлар раҳбарлари, ҳоким ёрдамчилари, ёшлар етакчилари ва хотин-қизлар фаоллари билан ҳам суҳбат бўлган. Янги «маҳаллабай» тизимини жорий этиш, тадбиркорликни ривожлантириш, аҳоли бандлигини таъминлаш, камбағалликни қисқартириш, фуқаролар муаммоларини ҳал қилиш бўйича олиб борилаётган ишлар тўғрисида фикр алмашилган.
Шу билан президент Бекобод шаҳрига ташрифини якунлаб, Тошкентга қайтиб келган.
Изоҳ (0)