Ўзбекистон ва Португалия ўртасида дипломатик муносабатлар ўрнатилганига 30 йил тўлди

2022 йил 12 август куни Ўзбекистон Республикаси ва Португалия Республикаси ўртасида дипломатик муносабатлар ўрнатилганига 30 йил тўлди. Шу муносабат билан Владимир Норов ва унинг португалиялик ҳамкасби Жоау Гомеш Кравино қўшма декларация имзолади. Бу ҳақда Ташқи ишлар вазирлиги хабар қилди.

«Ўтган учта ўн йилликдан иборат вақт давомида мамлакатларимиз жамиятларимизни бирлаштирган дўстликка асосланган муносабатларни ривожлантирди ва чуқурлаштирди. Биз 1000 дан ортиқ ўзбекларнинг Португалияда муваффақиятли интеграциялашганидан ғурурланамиз – улар Марказий Осиё давлатларидан энг йирик ҳамжамият ҳисобланиб, минтақавий ва икки томонлама даражадаги ҳиссаси энг юқори аҳамиятга эга», — дейилади вазирлик хабарида.

Қайд этилишича, Португалия ва Ўзбекистон 2022 йилни COVID-19 пандемиясидан сўнг тикланиш йили, яъни сиёсий, дипломатик ва иқтисодий алоқаларни яхшилаш сифатида кўрмоқда. Ушбу чекловларга қарамай 12 йиллик танаффусдан сўнг 2021 йил апрель ойида (видеоконференцалоқа орқали) сиёсий маслаҳатлашувларнинг иккинчи босқичи ўтказилган. Ҳар икки томон ҳам яқин орада бўлиб ўтадиган сиёсий маслаҳатлашувларнинг учинчи даврасини ташкил этишга хайрихоҳ бўлиб турибди.

Тўғридан-тўғри алоқалар пандемия даврида ҳам давом этган ва 2021 йил май ойида Португалия Савдо ва инвестиция агентлиги АICEП президентининг Тошкентга ташрифи мамлакатларнинг иқтисодий ҳамкорликни ривожлантиришдан манфаатдорлигини намоён этган. 2021 йилда савдо ҳажми пандемиягача бўлган даражадан ошган.

 «Иккала давлат ҳам глобал кун тартибини ишлаб чиқишга чорламоқда ва ҳозирги Евроосиё манфаатларини ҳисобга олган ҳолда бу позиция давом эттирилади.

Бугун биз нишонлаётган алоҳида воқеа нафақат байрам, балки мамлакатларимиз халқлари тинчлиги ва фаровонлиги йўлида икки томонлама сиёсий, иқтисодий ва маданий кун тартибини кенгайтириш ҳамда чуқурлаштиришга ўзаро содиқлигимизни намойиш этишнинг қимматли лаҳзасидир», — дейилади хабарда.