«Ўзбекнефтгаз» АЖ бошқарув раиси Меҳриддин Абдуллаев бошчилигидаги «Ишчи гуруҳ» Қашқадарё вилоятида табиий газ қазиб чиқриш ҳолати бўйича ўрганиш ишларини якунлаб, Бухоро нефтни қайта ишлаш заводида ўрганиш ишларини давом эттирди.
«Ишчи гуруҳ» аъзолари ишлаб чиқариш кўрсаткичларининг бажарилиши, модернизация жараёнининг ҳолатини ўрганиш мақсадида Бухородаги қайта ишлаш корхоналари фаолияти билан танишди. Дастлаб, Қоровулбозор шаҳридаги қуйиш-тўкиш эстакадасининг реконструкция қилиш ишлари ҳолати ўрганилди.
Бухоро нефтни қайта ишлаш заводида маҳсулотларни қабул қилиш, сақлаш ва жўнатиш имкониятларини кенгайтириш масалалари муҳокама қилинди ҳамда майдончада қуйиш-тўкиш эстакадасинининг металл конструкциялари, очиқ насос станциясининг монтаж ишлари бўйича кўрсатмалар берилди.
«Ўзбекнефтгаз» АЖ бошқарув раиси топшириғи асосида, айни пайтда заводда умумий майдони 15,75 гектарни ташкил этувчи қуйиш-тўкиш эстакадасини реконструкция қилиш ишлари олиб борилмоқда ва фойдаланилмаётган сиғимлар демонтаж қилиниб, технологик қувурлар ўрнатилмоқда.
Шунингдек, майдонда сиғимлар парки, объект инфратузилмаси, кўпикли ёнғин ўчириш тизимининг қурилиш, қайта тиклаш, темир йўл рельсларини ётқизиш ишлари бажарилмоқда. Айтиш жоизки, ишларнинг катта қисми завод мутахассислари ҳамда ишчи-ходимлари томонидан амалга оширилмоқда.
Маълумот учун, қуйиш-тўкиш эстакадаси хом-ашёни қабул қилиш, сақлаш ва тайёр маҳсулотларни жўнатиш учун мўлжалланган. Шу билан бирга, бу ерда цистерна ва автотцистерналардан қуйиш-тўкиш бўйича ишлар амалга оширилиши мумкин.
Бугунги кунга келиб, заводда сиғимлар паркини кенгайтириш лойиҳасини амалга ошириш фаол босқичга кирди. Ишларнинг бориши билан боғлиқ муаммоли масалалар муҳокамасига бағишланган сайёр йиғилиш ўтказилиб, унда «Ўзбекнефтгаз» АЖ бошқарув раиси томонидан объектларни ўз вақтида топширишни тезлаштириш бўйича топшириқлар берилди.
Бошқарув раиси ташаббуси билан мазкур лойиҳани амалга оширишни жадаллаштириш мақсадида 250 дан ортиқ нефть ва газ соҳаси мутахассислари жалб этилган ҳолда тезкор штаб тузилди. Барча ишлар хавфсизлик қоидалари ва ёнғин хавфсизлиги талабларига риоя қилинган ҳолда амалга оширилмоқда.
Ўз навбатида, Вазирлар Маҳкамасининг 2022 йил 17 июлдаги 158-сонли баённомасидаги топшириқни бажариш мақсадида бошқарув раиси истеъмолчиларни сифатли маҳсулотлар билан барқарор таъминлаш, нефть маҳсулотлари ишлаб чиқаришни кўпайтириш, зарур захираларни шакллантириш бўйича вазифалар берди. Хусусан, Бухоро нефтни қайта ишлаш заводида синтетик GTL нафтасини автомобиль бензини ишлаб чиқаришга жалб этиш бўйича ишлар олиб борилаётгани маълум қилинди.
Эслатиб ўтамиз, жорий йилнинг январь июль ойларида Бухоро нефтни қайта ишлаш заводида жами 900 минг тонна углеводород хом ашёси қайта ишланиб, белгиланган режа 103,2 фоизга бажарилди. Натижада 542,8 минг тонна автобензин ишлаб чиқарилиб, белгиланган режа 108,8 фоизга бажарилди. Шунингдек, 153,4 минг тонна дизель ёнилғиси ишлаб чиқарилиб, тасдиқланган режа 109,2 фоизга амалга оширилди.
Энг эътиборлиси, Республика товар-хом ашё биржаси савдоларида январь июль ойларида истеъмолчиларга сотилган жами автобензиннинг 70-80 фоизи ва дизель ёнилғисининг 40-50 фоизи Бухоро нефтни қайта ишлаш заводи ҳиссасига тўғри келди.
Бундан ташқари, Бухоро нефтни қайта ишлаш заводи томонидан углеводород хом ашёсини қайта ишлашда «Uzbekistan GTL» заводида ишлаб чиқарилаётган GTL нафта хом ашёсини қайта ишлашга жалб қилиш орқали автобензин ишлаб чиқариш миқдори оширилишга эришилмоқда.
«Ўзбекнефтгаз» АЖ матбуот хизмати
Изоҳ (0)