Россия ташқи ишлар вазирлиги Буюк Британиянинг 39 нафар фуқаросига қарши санкциялар киритди — уларнинг Россия ҳудудига кириши тақиқланди, деб ёзади Meduza.
Идора пресс-релизида айтилишича, ушбу сиёсатчиалр, бизнесменлар ва журналистлар «Лондоннинг бизнинг мамлакатимизни ёвуз қилиб кўрсатиш ва уни халқаро майдонда яккалаб қўйишга қаратилган душманлик сиёсатига имконият яратмоқда».
Рўйхатнинг бошидан мамлакат собиқ бош вазири Дэвид Кэмерон жой олган. Ундан ташқари, санкциялар таъсирига Лейбористлар партияси етакчиси Кир Стрармер, Лордлар палатаси аъзоси Жорж Робертсон, Шотландия вазирлар маҳкамаси котиблари Ангус Робертсон ва Фиона Хислоп, Британия-Украина савдо палатаси раҳбари Бейт Томс, шунингдек, Times, Guardian, Telegraph, Economist, Sun, BBC нашрлари ҳамда ITV ва Sky News телеканалларининг 12 нафар журналистлари учради.
«Буюк Британиянинг мамлакатимиз ҳақида ишончсиз маълумотлар тарқатиш, русофобия уруғини сочиш ва Киев неонацистик режимини қўллаб-қувватлаш бўйича хатти-ҳаракатларига Россия томонидан муносиб ва қатъий жавоб берилади», — дея маълум қилди Россия ТИВ. Идора, шунингдек, Россия «стоп-листи»ни кенгайтириш устидаги ишларни давом эттиришга ваъда берди.
Июль охирида Россия Австралиянинг 39 нафар фуқаросига, сал кейинроқ 32 нафар Янги Зеландия фуқаросига нисбатан санкциялар киритди. Июнь ўрталарида Россия ТИВ 49 нафар британияликни, ой охирида эса 25 нафар америкаликни, шу жумладан, АҚШ президентининг рафиқаси ва қизи Жилл Ва Эшли Байденларни «стоп-лист»га киритган эди.
Изоҳ (0)