АҚШ суди 2021 йилнинг январида Капитолийга ҳужумда иштирок этган Гай Реффитни етти йил-у уч ойга озодликдан маҳрум қилди. Бу ҳақда CNN хабар бермоқда.
Прокурорлар Реффитга 15 йиллик қамоқ жазосини талаб қилган. Айбловга кўра, у оломонни полицияни ёриб ўтиб, зинапоя орқали бинога югуришга ундаган, шунингдек, Капитолийга туташ ҳудудга ўқотар қурол олиб кирган. Уйга қайтгач, уни ФҚБга тутиб бермасликни айтиб фарзандларига таҳдид қилган.
Реффиттнинг адвокатлари унинг ўзи Капитолий биносига кирмаганини таъкидлади, шунингдек, у 2019 йилда ишидан айрилгани ва шунинг учун тушкунликда бўлганини маълум қилди. Ҳимоячи икки йиллик қамоқ жазосини сўради.
Реффит Капитолийга бостириб кириш ишида айбланувчиларнинг биринчиси бўлган, у тергов билан келишувга эришмаган.
Бунга қадар Капитолийга ҳужум учун максимал жазо беш йиллик қамоқ бўлганди.
Иш бўйича жами етти юздан ортиқ одам айбланмоқда. Уларнинг ўнга яқини аллақачон турли даражада қамоқ жазоларини олган.
Эслатиб ўтамиз, 6 январь куни АҚШ Конгресси аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда Трампнинг тарафдорлари Конгрессга бостириб кирган. Полиция бир неча соат ўтибгина намойишчиларни Капитолийдан ҳайдаб чиқаришга муваффақ бўлган. Ҳуқуқ-тартибот органлари ходимлари ўқотар қурол, дубинка, кўздан ёш оқизувчи газдан фойдаланган. Капитолийнинг хавфсизлик ходими билан биргаликда, беш киши ҳалок бўлган.
Изоҳ (0)