Медведевнинг «ВКонтакте»даги саҳифаси хакерлар ҳужумига учрагани маълум қилинди

Россия Хавфсизлик кенгаши раҳбари ўринбосари ва собиқ президент Дмитрий Медведевнинг «ВКонтакте» ижтимоий тармоғидаги саҳифаси хакерлар ҳужумига учради, деб журналистларга маълум қилди унинг ёрдамчиси Олег Осипов.

Унинг сўзларига кўра, Медведевнинг «ВКонтакте»даги сўнгги пости 31 июлда жойланган бўлиб, Ҳарбий-денгиз флоти куни муносабати билан табрикдан иборат.

«Саҳифага бузиб кириб, пост ёзиб, уни эълон қилганларга эса ‘ВКонтакте’ маъмурияти ва шундай ваколатга эга бўлганлар чора кўради», — деди Осипов.

Медведевнинг аппаратидагилар унинг саҳифасида 2 августга ўтар кечаси пайдо бўлган постни шундай изоҳлади. Пост бир неча дақиқадан кейин ўчириб ташланган.

Ушбу пост муаллифи СССРнинг қулашини «ҳалокатли хатолик» деб атаб, бу хато «тузатилиши»ни қайд этган, шунингдек, Қозоғистон ва Грузиянинг тақдири ҳақида фикр билдирган эди.

Медведевнинг ижтимоий тармоқлардаги аккаунтлари аввал ҳам ҳужумга учраган. 2014 йилда унинг Twitter’ида бош вазир лавозимидан кетиши ҳақида хабар чиққанди. «Истеъфога чиқяпман. Ҳукуматнинг хатти-ҳаракатларидан уятдаман. Мени кечиринг», — дейилган эди постда. 2019 йилда эса хакерлар Медведевнинг инглиз тилидаги Twitter’ида Москвадаги Ироқ элчиси хабарига жавобан лотин алифбосидаги ҳарфлар ва сўзлардан иборат тушунарсиз постни қолдирган эди.