Rossiya Xavfsizlik kengashi rahbari o‘rinbosari va sobiq prezident Dmitriy Medvedevning “VKontakte” ijtimoiy tarmog‘idagi sahifasi xakerlar hujumiga uchradi, deb jurnalistlarga ma’lum qildi uning yordamchisi Oleg Osipov.
Uning so‘zlariga ko‘ra, Medvedevning “VKontakte”dagi so‘nggi posti 31-iyulda joylangan bo‘lib, Harbiy-dengiz floti kuni munosabati bilan tabrikdan iborat.
“Sahifaga buzib kirib, post yozib, uni e’lon qilganlarga esa ‘VKontakte’ ma’muriyati va shunday vakolatga ega bo‘lganlar chora ko‘radi”, — dedi Osipov.
Medvedevning apparatidagilar uning sahifasida 2-avgustga o‘tar kechasi paydo bo‘lgan postni shunday izohladi. Post bir necha daqiqadan keyin o‘chirib tashlangan.
Ushbu post muallifi SSSRning qulashini “halokatli xatolik” deb atab, bu xato “tuzatilishi”ni qayd etgan, shuningdek, Qozog‘iston va Gruziyaning taqdiri haqida fikr bildirgan edi.
Medvedevning ijtimoiy tarmoqlardagi akkauntlari avval ham hujumga uchragan. 2014-yilda uning Twitter’ida bosh vazir lavozimidan ketishi haqida xabar chiqqandi. “Iste’foga chiqyapman. Hukumatning xatti-harakatlaridan uyatdaman. Meni kechiring”, — deyilgan edi postda. 2019-yilda esa xakerlar Medvedevning ingliz tilidagi Twitter’ida Moskvadagi Iroq elchisi xabariga javoban lotin alifbosidagi harflar va so‘zlardan iborat tushunarsiz postni qoldirgan edi.
Izoh (0)