Фарғонада Damas ҳайдовчиси қувиб ўтиш қоидасини бузиши оқибатида икки киши ҳалок бўлди

Фарғона вилояти Фарғона туманида икки кишини ўлими билан якунланган ЙТҲ юз берди. Бу ҳақда ЙҲХБ матбуот хизмати хабар берди.

Воқеа 13 июль куни соат 18:15 ларда, туман ҳудудидан ўтган 4Р-146 Фарғона—Чимён автомобиль йўлининг 5-километрида юз берган. Ҳайдовчи А.М. (2000 йилда туғилган) Damas’ни бошқариб бораётиб, қувиб ўтиш қоидасини бузиб, қарама-қарши йўналишга ўтиб кетган.

Сўнг бошқарувни йўқотиб ағдарилиб кетиши натижасида қарама-қарши йўналишда ҳаракатланиб келаётган М.А (1964 йилда туғилган) бошқарувидаги Lacetti билан тўқнашган.

Оқибатда Damas’да бўлган икки нафар йўловчи воқеа жойида вафот этган. Шунингдек, яна икки нафар йўловчи тан жароҳати олиб шифохонага ётқизилган.

Бундан аввал Фарғонада қарама-қарши йўналишга чиқиб ҳаракатланган Lacetti Matiz билан тўқнашиши оқибатида бир киши ҳалок бўлгани ҳақида хабар берилган эди.