Жиззах вилояти Янгиобод туманида 4 июль куни Damas ва «ВАЗ-2106» иштирокида йўл-транспорт ҳодисаси содир бўлди. Бу ҳақда вилоят Ички ишлар бошқармаси хабар қилди.
Қайд этилишича, ҳолат шу куни соат тахминан 7:30 лар атрофида Янгиобод тумани ҳудудидан ўтувчи 4Р-34 Жиззах—Равот—Зомин—Савот—Ховос автомобиль йўлининг 91-километрида содир бўлган. Damas автомашинаси ҳайдовчиси (1997 йилда туғилган) бошқарув вақтида ухлаб қолган. Сўнг қарама-қарши йўналишда ҳаракатланиб келаётган ҳайдовчи (1999 йилда туғилган) бошқарувидаги «ВАЗ-2106» автомашинасининг йўлига чиқиб кетиб, тўқнашган.
ЙТҲ оқибатида Damas машинасидаги йўловчи (1987 йилда туғилган) оғир тан жароҳатлари билан воқеа жойида ҳалок бўлган. Ушбу автомашина ҳайдовчиси эса турли тан жароҳатлари билан туман касалхонасига ётқизилган.
Изоҳ (0)