Ўзбекистоннинг қайси ҳудудлари «ишбилармонроқ» экани маълум бўлди
Ўзбекистонда 2022 йилнинг 1 январидан 27 июнигача бўлган даврда ишбилармонлик фаоллиги эълон қилинди. Бу ҳақда Иқтисодий тадқиқотлар ва ислоҳотлар маркази «Дарё»га маълум қилди.
Мониторинг натижаларига кўра, йил бошидан бери Ўзбекистонда солиқ тушумлари ҳажми ўтган йилнинг мос даврига нисбатан 15,3 фоизга ошган.
Шу билан бирга, солиқ тушумларининг сезиларли ўсиши:
- Фарғона — 37,6 фоизга;
- Сурхондарё — 37,5 фоизга;
- Самарқанд — 35,9 фоизга;
- Бухоро — 35,9 фоизга;
- Хоразм — 35,2 фоизга;
- Андижон — 33,6 фоизга;
- Тошкент — 44,6 фоизга қайд этилди.
Таҳлил қилинган давр учун божхона тўловлари бўйича тушумлар 2021 йилнинг шу даврига нисбатан 41,2 фоизга ошди.
Божхона тушумларининг энг юқори ўсиши:
- Хоразм — 77,9 фоизга;
- Сирдарё — 70,6 фоизга;
- Андижон — 61,3 фоизга;
- Бухоро — 56,3 фоизга;
- Жиззах — 49,8 фоизга;
- Қорақалпоғистонда — 68 фоизга кузатилди.
Давлат божхона қўмитаси маълумотларига кўра, жорий йил бошидан 27 июнга қадар товарлар экспорти ҳажми ўтган йилнинг мос даврига нисбатан 25,4 фоизга ошган.
Товарлар экспорти ҳажмининг сезиларли ўсиши
- Қашқадарё — 61,6 фоизга;
- Навоий — 52,5 фоизга;
- Самарқанд — 44,5 фоизга;
- Андижон — 33,5 фоизга;
- Наманган — 26,9 фоизга;
- Тошкент — 53 фоизга қайд этилди.
Ўзбекистон экспортининг ўсиши саноат маҳсулотлари, озиқ-овқат маҳсулотлари, кимё ва қишлоқ хўжалиги маҳсулотлари экспортининг ўсиш суръатлари билан изоҳланади.
Товарлар экспортининг камайиши Бухоро (22,2 фоизга), Сурхондарё (6,8 фоизга) вилоятларида ва Қорақалпоғистонда (17 фоизга) кузатилди.
Бухоро вилоятида экспортнинг камайишига 2022 йилнинг январь—июнь ойларида пахта толасининг экспорт ҳажми камайгани сабаб бўлмоқда, бу эса ушбу маҳсулотларнинг ички бозорга йўналтирилганлиги билан боғлиқ.
Қорақалпоғистонда экспорт ҳажмининг камайиши пластмасса ва ундан тайёрланган маҳсулотлар, ип-калава ва фармацевтика маҳсулотлари экспортининг камайганлиги билан изоҳланади.
Ўз навбатида, Сурхондарё вилоятида экспорт ҳажмининг камайиши мева-сабзавот маҳсулотлари экспортининг камайиши ҳамда пахта толаси ва ип-калаванинг ички бозорга йўналтирилиши билан боғлиқ.
Таҳлил қилинаётган даврда Ўзбекистон Республика товар-хом ашё биржасида тузилган битимлар ҳажми 42,8 фоизга ошди.
Биржада савдо фаоллигининг сезиларли даражада ўсиши:
- Хоразм — 68,1 фоизга;
- Навоий — 65,4 фоизга;
- Жиззах — 54,6 фоизга;
- Қорақалпоғистонда — 49,8 фоизга;
- Тошкент шаҳрида — 68,5 фоизга кузатилмоқда.
Ушбу ҳудудларда тузилган битимлар ҳажмининг ўсиши техник уруғлар, минерал ўғитлар, шакар, ўсимлик ёғи, этил спирти, автомобиль бензини, дизель ёнилғиси, қурилиш ва маиший материаллар, қора ва рангли металлар ва бошқалар каби товарларни савдосини кўпайтириш орқали таъминланди.
Сирдарё вилоятида 7,2 фоизга пасайиш кузатилди. Бу полипропилен, пахта толаси, техник уруғлар, ўсимлик ёғи, шрот ва пўстлоғи, қора металл, цемент, буғдой, совун маҳсулоти ва чорва озуқаси билан савдо қилиш бўйича битимлар сони ва ҳажмининг камайиши билан изоҳланади.
