Қорақалпоғистонда ЙҲХБнинг сўконғич мансабдори ишдан олиниб, ўрнига янги раҳбар тайинланди. Бу ҳақда «Дарё» мухбири хабар берди.
Маълум бўлишича, бугун, 30 июнь куни Қорақалпоғистон Республикаси ИИВ тизимида 4 та тайинлов амалга оширилган.
Ҳудуднинг Шуманай, Хўжайли ва Нукус тумани Ички ишлар бўлимларига янги раҳбарлар тайинланган. Шунингдек, Қорақалпоғистон йўл ҳаракати хавфсизлиги бошқармаси бошлиғи ҳам ўзгарган.
Подполковник Улуғбек Худайбергенов Шуманай тумани Ички ишлар бўлими бошлиғи этиб тайинланган бўлса, яна бир подполковник Полат Искендеров Хўжайли ва Саламат Қаллибеков Нукус тумани ИИБ бошлиғи лавозимини эгаллаган.
Подполковник Казбеков Салават Алибекович эса Қорақалпоғистон Республикаси ИИВ ўринбосари — Йўл ҳаракати хавфсизлиги бошқармаси бошлиғи этиб тайинланган. Салават Алибекович тайинловга қадар Нукус тумани ИИБ бошлиғи бўлиб ишлаган.
Эслатиб ўтамиз, собиқ бошлиқ Б.Хўжанов аввалроқ сўконғич ва муштумзўрлиги билан жамоатчиликка яхши танилганди. У қўл остидаги ходимларига куч ишлатиб, ҳақорат қилган. Шундан кейин ЙҲХБ бошлиғи интизомий жазога тортилиб, калтак еган ва ҳақоратга кўмилган ЙПХ ходимлари эса ишдан олинганди. Ҳозирча капитан Б.Хўжанов қайси лавозимда иш бошлагани номаълум.
Изоҳ (0)