Россия Мудофаа вазирлиги махсус ҳарбий операция бошланганидан буён Украинага 6956 киши кириб келгани, шуларнинг 1956 нафари аллақачон йўқ қилингани, 1779 нафари эса жўнаб кетгани ҳақида хабар берди, деб ёзади «Интерфакс».

«2022 йил 17 июнь ҳолатига рўйхатларимизда 64 та мамлакатдан келган ёлланма жангчилар ва қурол-яроғдан фойдаланиш бўйича мутахассислар бор», — деди Мудофаа вазирлиги расмий вакили Игорь Конашенков.

Унинг қўшимча қилишича, Украинадаги жанговар ҳаракатларда қатнашаётган чет эллик ёлланма аскарлар сони қисқармоқда, 20 минг киши деган хабарлар нотўғри.

Унинг сўзларига кўра, Россия Мудофаа вазирлиги Украинага кириб келаётган ҳар бир хорижлик ёлланма аскарни кузатмоқда ва қайд этмоқда.

«Бунинг устига, бизнинг ҳисоб базаларимизга ҳозир нафақат Украина бўлинмалари таркибида бевосита жанговар ҳаракатларда қатнашаётган ёлланма аскарлар киритилган. Биз шуғуллантириш, Украинага етказилаётган Ғарб қурол-яроғларини қўллаш ва таъмирлашда ёрдам бериш учун келган инструкторларни ҳам ҳисобга оламиз», — деди Конашенков.

Вазирлик маълумотларига кўра, энг кўп ёлланма аскарлар Украинага Польшадан (1831 киши), Канададан (601) ва АҚШдан (530) келган. Ёлланма аскарлар ва қурол-яроғдан фойдаланиш бўйича мутахассисларнинг умумий сони 6956 нафарни ташкил этиб, ҳозир Украинада уларнинг 3221 нафари қолган.

Аввалроқ АҚШ Украина томонида туриб жанг қилган уч америкалик ғойиб бўлганини маълум қилганди. У йўқолган фуқаролар юзасидан ҳозирча Россия билан боғлангани йўқ, чунки Америка ҳукуматида аскарларни Россия асирга олгани ҳақида ишончли асослар йўқ.

9 июнь куни «Донецк халқ республикаси» Олий суди Украина томонида туриб жанг қилган британияликлар Шон Пиннер ва Эйден Эслинни ҳамда марокашлик Брагим Саадунни ўлим жазосига ҳукм қилганди.

Улар устидан суд жараёни 7 июнь куни бошланган, улар ДХР Жиноят кодексининг 34-моддаси («Бир гуруҳ шахслар томонидан жиноят содир этиш»), 323-моддаси («Ҳокимиятни мажбуран тортиб олиш ёки ҳокимиятни мажбуран ушлаб туриш») ва 430-моддаси («Ёлланиш»)  билан айбланмоқда. Маҳбуслар ўз айбларига қисман иқрор бўлган.

АҚШ Давлат департаменти раҳбари Энтони Блинкен уларга ўлим жазоси тайинланганидан хавотир билдирди. Британия расмийлари ҳам ушбу ҳукмни қоралади. Британия ташқи ишлар вазири Лиз Трасс ДХР судининг қарорини тўқима ва ҳеч қандай қонунга асосланмаган деб атади.