Россия Украинада махсус ҳарбий операция ўтказмоқда, у қўшни давлатга бостириб киргани йўқ, деди Россия ташқи ишлар вазири Сергей Лавров BBC билан суҳбатда.
«Биз Украинага бостириб кирганимиз йўқ. Ғарбга Украинани НАТОга жалб қилиб, жиноий фаолият билан шуғулланаётганини тушунтиришга имконимиз қолмагач, махсус ҳарбий операцияни эълон қилдик», — деди Лавров.
Вазирнинг таъкидлашича, Россияда «бошқа танлов қолмаганди» ва Москва буни «кўп марта, минг марта тушунтирган».
«Ҳозир Ғарб қуроллари билан Украина режими тинч аҳолига, шаҳарларга ҳужум қилмоқда», — дея даъво қилди Лавров.
Россия 24 февралдан бери Украинада ҳарбий ҳаракатлар олиб бормоқда. Россия президенти Владимир Путин «ҳарбий операция»нинг мақсадини Донбасс аҳолисини ҳимоя қилиш, шунингдек, қўшни давлатни демилитаризация ва «денасификация» қилиш деб атаган.
Уруш мобайнида Россия деярли бутун Херсон вилоятини ва Запорожье вилоятининг муҳим қисмини назорат остига олди. Донбасс учун жангда Россия Луганск вилоятини деярли тўлиқ эгаллаб олди, Донецк вилоятида эса ўз назорати остидаги ҳудудларни кенгайтирди.
Изоҳ (0)