Россия президенти Владимир Путин кузда Шанхай ҳамкорлик ташкилотининг (ШҲТ) Самарқандда ўтказиладиган саммитида иштирок этади. Бу ҳақда Россия етакчисининг ёрдамчиси Юрий Ушаковга таяниб, «ТАСС» хабар берди.
Ушаковнинг сўзларига кўра, Владимир Путин ШҲТ саммитидан ташқари Шарқий иқтисодий форум, шунингдек, Қозоғистонда ўтказиладиган Мустақил Давлатлар Ҳамдўстлигига (МДҲ) аъзо давлатларнинг Давлат раҳбарлари кенгашида ҳам иштирок этади.
Шанхай ҳамкорлик ташкилотининг Самарқанд саммити 2022 йил 15—16 сентябрь кунлари бўлиб ўтади.
Маълумот учун, Шанхай ҳамкорлик ташкилотининг Самарқанд саммити Эрон 2021 йил сентябрида ташкилотга тўлақонли иштирокчи сифатида қўшилганидан бери биринчиси бўлади. ШҲТга аъзо давлатлар: Ўзбекистон, Хитой, Россия, Қозоғистон, Қирғизистон, Тожикистон, Покистон, Ҳиндистон ва Эрон. Афғонистон, Мўғулистон ва Беларусь ташкилотда кузатувчи, Туркия эса мулоқот бўйича ҳамкор сифатида иштирок этади. Саммитда ташкилотга аъзо кўплаб давлатлар билан умумий чегарага эга Афғонистондаги вазият ҳар томонлама муҳокама қилинади ва муҳим қарорлар қабул қилиниши кутилмоқда.
Изоҳ (0)