Шакира қачонлардир Пикени деб Аргентина президентининг ўғлидан воз кечганди: машҳур хонанда ва футболчининг севги тарихи

Колумбиялик қўшиқчи ва таниқли футболчи 11 йиллик муносабатлардан сўнг кутилмаганда ажралишларини эълон қилди. El Periodico нашрининг хабар беришича, хонанда Пикенинг хиёнат қилаётганини билиб қолган. Испаниялик футболчи жамоадоши Рики Пуч билан биргаликда тунги клубларга тез-тез ташриф буюрган. Клубларда Пикени бегона аёллар билан бирга кўришган. «Wday.ru» нашри уларнинг романтикаси қандай бошланганини ва қандай ривожланганини ёдга олади.

Пике ва Шакира бир-бирига шунчалик мос эдики, улар бир бутун ва бир-бирини тўлдирадиган жуфтлик сифатида қабул қилинди. Ажабланарлиси шундаки, қўшиқчи ва футболчи бир кунда, 2 февралда туғилган, аммо ўн йил фарқ билан. Иккала севишганни ҳеч нарса ажрата олмайдиганга ўхшарди, аммо тақдирнинг ўз режаси бор экан.

Улар илк бор танишганларида Шакиранинг Жерарддан катта эканлиги «Барселона» ҳимоячисини умуман ташвишга солмади. Пике машҳур қўшиқчини Waka-Waka клипини суратга олиш майдончасида учратганидан кейин чинакамига севиб қолди. Шакиранинг сўзларига кўра, мазкур қўшиқ 2010 йилги ФИФА Жаҳон чемпионатининг расмий мадҳиясига айланган бўлса-да, ўзи ҳеч қачон футболнинг ашаддий мухлиси бўлмаган ва Жерар Пике кимлигини билмас ҳам эди.

Ваҳоланки, футболчининг ўзи машҳур қўшиқчи ҳақида жуда кўп нарса биларди. Шунинг учун хонанда билан муносабатларда биринчи қадамни айнан Пике қўйди. Таниқли футболчи кейинчалик тан олганидек, ҳаммаси унинг беғараз хабаридан бошланди: у қўшиқчидан Жанубий Африкадаги об-ҳаво ҳақида сўради, чунки Шакира ўша ерда бўлиб, чемпионат очилишида қўшиқ куйлаши керак эди. Жерар эса эндигина мамлакатга ташриф буюриши кутилаётганди. Спортчининг қатъиятига ҳавас қилса арзийди: гўзал қўшиқчи билан танишиш учун қўлидан келган ҳамма нарсани қилди.

Шакиранинг ўзи ҳам уни чемпионат охирига келибгина кўрди. Пике ўзининг бўлажак севгилисига унинг учун финалга чиқишига ваъда берди. Шундай бўлди ҳам: учрашувдан кейин севишганлар бир зумга ҳам ажралмади. Матбуот жуфтликни романтик учрашувларида қўлга туширишга ҳаракат қилди, аммо Шакира ҳам, Жерар ҳам муносабатлари ҳақида гапиришга шошилмади. Гап шундаки, улар танишганида иккаласининг ҳам ҳаётида бошқа биров бор эди.

Шакира Аргентина собиқ президентининг ўғли Антонио Де ла Руа билан 11 йилдан бери гаплашар, Пике эса актриса Нурия Томас билан 1 йилдан буён ишқий муносабатда бўлган. Аммо Шакира ва Пике бир-бирларига бўлган ҳис-туйғуларига қарши бора олмади ва бир йиллик танишувдан сўнг ўрталаридаги муносабатларини оммага эълон қилишди. Шундан кейингина севишганлар ҳар қадамини пойлайдиган папарацсилардан яширинишни тўхтатди, аксинча бир-бирларига бўлган оташин муҳаббатларини барчага кўз-кўз қилишди.

Шакира севган инсони учун ҳатто каталон тилини ўрганишни ва унинг иштирокидаги барча футбол матчларида иштирок этишни бошлади. Жерар ҳам Шакиранинг концертларига бажонидил борар, ҳатто шундай вақтлар бўлганки, уни мусиқий карьерасини ташламасликка ҳам кўндира олган.

Машҳур жуфтлик карьерадан тортиб оилавий масъулиятгача бўлган ҳамма нарсада бир-бирларини сўзсиз қўллаб-қувватладилар. 2012 йилда уларнинг биринчи фарзанди Милан, 2015 йилда эса иккинчи ўғли Саша дунёга келди. Шакира бу йиллар давомида Жерарга қойил қолишдан тўхтамас, уни дунёдаги энг яхши ота деб биларди. Жуфтликка барчанинг ҳаваси келарди.

Бироқ Шакира ва Жерар муносабатларини қонунийлаштиришга шошилишмасди. Гап-сўзларга қараганда, айнан хонанда никоҳдан ўтишни иложи борича кечиктиришга ҳаракат қилган.

Шакира «рафиқа» мақомига эга бўлишни хоҳламаслигини, муносабатларида никоҳдан сўнг йўқолиши мумкин бўлган маълум бир эҳтиросни сақлаб қолиш муҳимлигини бир неча бор айтиб ўтган. Шунга қарамай, қўшиқчининг ўзи агар ким биландир турмуш қурмоқчи бўлса, у инсон орзусидаги эркак — айнан Жерар бўлишини ҳам алоҳида таъкидлаганди.