Европа футбол ассоциациялари иттифоқи (УЕФА) 2022/23 йилги мавсум учун Чемпионлар Лигасининг дастлабки тақвимини эълон қилди.
Мусобақанинг ўтиш босқичи 21 июнь куни бошланади, ушбу босқичнинг финал ўйинлари 24 июнь куни бўлиб ўтади.
Биринчи саралаш босқичи ўйинлари 5/6 ва 12/13 июль кунлари, иккинчиси — 19/20 ва 26/27 июль кунлари, учинчиси — 2/3 ва 9 август саналарида бўлиб ўтиши режалаштирилган. Саралашнинг плей-офф баҳслари эса 16/17 ва 23/24 август кунларига мўлжалланган.
Чемпионлар Лигасининг гуруҳ босқичи ўйинлари 6/7 сентябрдан то 1/2 ноябрга қадар давом этади. Плей-оффнинг нимчорак финал ўйинлари 14 февралдан 15 мартача, чорак финал — 11/12—18/19 апрель саналарида, ярим финал баҳслари эса 9/10—16/17 майда ўтказилиши режалаштирилган.
2022/23 йилги мавсум Чемпионлар Лигаси финали тахминан 10 июнь куни Истанбулда бўлиб ўтади. Истанбул дастлаб 2020 йилги финалга мезбонлик қилиш учун танланган эди, аммо COVID-19 пандемияси туфайли мезбонлик Лиссабонга насиб этганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)